美國納指前晚喺高位回落，今個浪炒AI概念股，起初唔係咁多人相信，其後先紛紛跟入，前晚一支大陰燭落，可作為一個少少預警嘅提示，有機會出回吐，如納指失守十天線，有機會進一步調整。前晚見強勢嘅Nvidia亦曾跌破十天線，早前績後爆升嘅低位366.3，如一失守就表示最近十天買貨嘅人已全部坐艇，但下面個上升裂囗太大，回幾多冇法估計。加拿大意外地加息，可能對美聯儲局有些少壓力，9月減息機會微乎其微，最快都要11月先有望，即市場要捱多幾個月高息，而美國債務問題解決後，政府必會盡快發債填補資金缺囗，又會抽走市場一批資金，對股市會有少少影響，借勢回吐理所當然。

港股一個悶字，得800幾億成交，隨納指低開後守得住19000後午後又跟A股上，收19299，又升47點。港股成交係少，但有力，矮仔上樓梯格局，今個禮拜周線圖仲跟到上星期周線倒轉鎚頭走勢，冇得擋。大市成交少，已經冇咩板塊輪動可說，幾大科技股股反彈後橫行，冇錢推唔上，如果儲力等下一個升浪，恒指仲有得上。幾隻國內基建股力度較好，水泥同某部份資源股都跟上，中交建（1800）4.9至5元水平宜先部份獲利，始終市況淡靜就要保守一點。

美股反彈，新申領失業人數上升，加息憂慮又緩和，其實下星我估計聯儲局加息機會唔大，數據只係比市場炒上落。納指跌一日又反彈1％。

美匯隨債息一齊跌，最新報103.3，英鎊強勢，升上1.256，日圓138.8，人民幣噚日日中曾廹近7.15，現反彈上7.12。