中國公佈五月份出入囗數字，以美元計，出囗按年跌7.5％，預期跌1.8％，而入囗則跌4.5％，較預期跌8％為好。出囗下跌某程度上可以理解，外圍預期經濟衰退，訂單自然減少，但差到同預期相差咁大，就有啲意外。而入囗跌4.2％，反映咗中國市面上消費未如復常後預期咁好，同埋工業生產下降致原材料入囗下跌。

依家國內問題係經濟唔明朗，銀行有錢商家都唔敢借去擴張，今年首季銀行存款上升，中國人儲錢係美德，不過依家唔敢使錢，皆因對前景存疑，朋友喺國內生活，表示負擔得起嘅人多只會肯花錢喺飲食方面，其他消費都會減少。不過以依家嘅環球經濟環境下，中國要再減息放水實在有難度，中美已有一定程度息差，人民幣又走弱，噚日日中美元對人民幣已升穿7.13，未有止跌跡象，息差再擴濶只會加快人仔下跌，對中港股市不利，股市跌，內需恐縮得更快。上證A股繼續打3200保衛戰，噚日收3198，微升2點，但深成指、科創板就相對偏軟。

港股再升150點，承接隔晚ADR中概股指數做好，但成交又縮到867億，個市冇水，升市都冇人入場，但要掉頭做淡圖表上係唔可能，恒指短浪係向上，雖然噚日開陰燭，但恒指已連續三日企喺10天線上，噚日更收高喺20天線上，要做淡都要等佢轉身先可考慮，跟勢就唯有小注做好或者向個股埋手，等市場比訊號我哋。

大市要展升浪，科技股一定要行，近兩日升市中大型科技股升勢冇灌注力，開高回落，成交薄弱推唔上一眾大價股。星期一提到中特估中嘅中交建（1800）同中鐵（390）噚日有少少起動，應該都係板塊輪流炒，前者去勢較強，希望可以上到5元。同類概念中治（1618）都有得諗，如起動可以1.9元為止蝕跌跟炒一轉。

美股個別發展，納指跌170點，微軟、Nvidia同跌超過3％。幣安趙長鵬被指轉移客戶資金，幣安被查，比特幣連日大升大跌，最新又回落到26300美元。美十年債息升上3.8厘，加拿大和澳洲相繼地意向繼續加息，美匯挫一挫後回穩，最新為104.1，人民幣已去到7.145。