亞洲區最靚仔仍然係日股，六月一日見到十天線就連升四日，噚日升到上32500，四日累升1600點，外資未流入中港股市，加上有股神加持，轉向投資盟國市場。

上證A股連續兩日喺上月24日嘅裂囗頂見頂，噚日就回得較深，收穿3200，跌37點，繼續低位橫行，難怪阿爺前幾日話投資國內股市要有耐性同決心，而缸邊友就繼續葡萄日本股市升勢。

相對內地市場，港股硬淨少少，上午多升一口，果然成功回返咗第二個裂囗頂19363同二十天線就有阻力，三日差唔多升咗千二點，回一回好正常，午後跟國內股市回落，微跌9點，成交仲係只得千億，始終唔合格。恒指自上周五起仍維持反彈之勢，暫時仍未扭轉，短炒而小注順勢做，總之反彈穿18800就要計數。

大盤中騰訊（700）領跌，之前每日回購3億元以上護盤，星期一回購只得一億元，市場都會擔心回購力唔夠，騰訊股價自然較弱，其他大科技股就前收市位上下反覆。

創科（669）又再度被沽空機構追擊，指其欺詐大客戶Home Depot至少四年時間，未來營業額會減少三份之一，創科股價最低見68.65元，收市70.45。

美股先跌後回穩，道指微升，納指升47點。除幣安外，coinbase亦被美國監管機構提出訴訟，而幣安更被政府要求凍結資產，比特幣反而急跌一日後快速反彈，最新報27100美元。

中資股金龍指數上升逾3％，帶重恒指夜期升360點。

美聯儲局下周議息前美匯104.13，繼續反覆，人民幣7.126，亦繼續弱方徘徊。