港股急升一日後轉窄幅上落，上午曾跌近10天線，守得住尾市再發力衝一衝，恒指高收19108，升158點，成交又縮返去千億下面。上證A股微升2點，噚日叫做補返上個月24日嘅下跌裂囗，可惜冇力再上，上證股市都算做到止跌，暫時只屬反彈，未可叫做係回升。

恒指急升後仍開到支小陽燭，成交冇錯仲仍然太少，不過噚日企得住，算係有承接，但市場係唔相信見底，否則成交肯定多，明知見底一定買。係反彈定係見底都好，暫時唔適宜睇跌，上星期五恒指周線的確做咗一個倒轉鎚頭，噚日未有逆轉行，況且恒指上星期跌到18000點技術上係滿足咗調整0.5至0.618作調整幅度嘅要求，要調轉頭失守10天線先可以淡一啲，跌穿18550就可肯定係反彈。至於向上睇，上月尾留低咗下跌裂囗，第一個補咗，第二個嘅裂口頂喺19363，接近20天線19333，相信會係初步阻力所在。睇遠一啲就要睇22700伸延落嚟嘅下降阻力，暫時喺19700水平，當然再要配合成交，最好喺冇指數換馬情況下有千二、三億信心會大好多。

噚日北水錄得108億元淨流入，屬於近期新高，主要買人盈富基金。

美國5月兩個服務業指數數都較預期為低，蘋果喺開發者大會中公佈全新系統IOS17同其頭戴式裝置Apple Visio Pro，會前蘋果股價升上近185美元新高，會後股價倒跌至179.6美元。美股亦未能承接上周五升勢，道指跌200點收，納指冇起跌。

美匯103.94，非美貨幣橫行，人民幣彈一彈又重回7.12。沙特下月起加碼減產，紐約期油一度升上75美，最新71.9美元。

幣安被監管機構指控，比特幣最新25800美元，跌1300美元。