2023年09月29日

美國債務上限問題正式解決,上星期公佈嘅大非農新增職位增加33.9萬個,又多過市場預期,勞工市場仍然緊張,一方面紓緩經濟衰退擔心,其實相信係早嚟同遲嚟嘅分別,至於息囗去向,有投票權嘅官員言論都係一半半,6、7兩月或者會再加一次,但可能偏向6月先等,7月再算。

美股借勢炒上,一直跑輸嘅道指大升700點,又重上上面嘅阻力位,下面32600守得幾穩。納指升1%,突破13181阻力,就算唔買都唔好同佢作對。

美10債息3.7厘,美匯回升上104,日圓140,澳元0.66,人民幣上周五日中曾反彈至7.08,最新又回軟到7.11。

踏入6月,恒指第一日彈唔起,第二日就借人民幣反彈作催化劑大幅回升733點,成交扣除恒指做rebalancing下都有千二、三億元,以大陽燭升700幾點下,仲差少少,周線做咗支大長腳轉升,算係第一個好訊號,如果係見底,今個禮拜最好要承接再上,若做後抽,上星期五開市價18566不能失守。科技股跌得深,成大市反彈火車頭,幾大科技股全升5至7%不等,科指重上3750上面,成功扭轉下破走勢。中特估相對遜色,除咗恒指成份股內嘅中特估跟指數升同資源股隨美元回落反彈外,其他低市值,高息嘅中特估未跟到升幅,且看今個禮拜會否接力上,會優先留意中交建(1800)同中鐵(390)。

因為國內樓市持續低迷,消息指內地正研究進一步扶持樓市措施,包括降低首期比率同埋放寛限購措施,內房板塊大幅反彈,龍湖(960)升17%,融創(1918)升12%,連越秀(123)都彈咗一成,錯過咗低買機會,越秀新股今日出籠,睇吓有冇較低位買。

美國ADR中概股指數上升,帶動恒指夜期同黑期都上升約200點。