美國債務協議過咗眾議院，只係等參議院通過，又再避免違約。呢關過咗，政府一定立即發債，又會再抽走市場資金。另外市場又會再將焦點放返喺息囗身上，近日聯儲局官員喺議息blackout period封囗期前又再放鷹，美股未有太大反應，道指仲企喺升軌上，失守32600就要多小心，納指去到前頂13181就有阻力，大家都知前納指係靠幾大科技股頂住，有好消息嘅NVDA都係高位出針，慎防出回吐。

上證A股就繼續打3200保衛戰，指數跟住人民幣匯率反向上落，收番3204，人仔冇起色，噚日朝早曾低見7.1，到國內股市收市又返去7.13，阿爺未有如市場希望出嚟護盤。

5月港股跌1600點，到6月開局，係出咗反彈，但係力度就欠奉，全部都係幾大科技股帶動，之後跟上證股市回軟，恒指收市仲要倒跌17點，成交增至1285億元，扣起差唔多百億元盤前因前日MSCI未完成的交易，接近千二億元已經係近期高位，希望成交再多，市場有承接力。

ATMJ早段升市時彈幅顯著，可惜收市時升幅已經蒸發咗最少6成，巴巴（9988）仲要倒跌。中特估概念股份大多都仲要跌。平保（2318）已率先落到250天線並考驗支持，內銀內房繼續差，越秀（123）早前以9元供股，供股價一早失守，轉跌多日後噚日突然一大支陰燭落，查後發現原來下星期一供股出籠，唔排除T-2前有人偷步出貨，等佢沽多兩三日，可能有得一搏。中特估中，三大鐵路基建股好似係最早企穩嘅一批，連同中國中治（1618）可率先留意。

國內電車股又公佈5月數據，比亞廸（1211）銷售倍增至24萬部最靚仔，理想（2015）交付升1.5倍，蔚來（9866）升16％，小鵬（9868）最差倒退26％。

今早美匯回落至103.52，英鎊1.25，日圓139，人民幣反彈至7.10，配合美股三大指數全面向上，中概股指數急升4.1％，其中金山雲升20％，百度ADR股價折合港元128.5。恒指夜期升330點，而外圍恒指今早報18500，預示今早高開約300點。