黑期結算日，中港股市繼續跌落去，早上國家公佈5月份製造業同非製造業PMI，全部低於預期，製造業PMI 48.8，低過預期49.5，處盛衰分界線下。數據一出，國內股市又跌落去，尾市抽一抽，重上3200點樓上收，美元兌人仔升到上7.13，人仔冇起色，國內股市都只有彈，難回升。

港股跌近18000邊，市場人士又回想起舊年大跌市期間，每日都有更低位比你入市，而港股又差不多成為今年成熟市場中表現最差嘅市場，仲喺俄羅斯之下。若干年前，恒仲高過道指同日經指數，依家只得佢嘅60％以下，就連德國DAX 指數都就追上嚟，試問港股何去何從。

恒指噚日低見18044，尾市反彈上18234收，仲係跌362點，成交1700億元，因盤後有MSCI做rebalancing ，4點成交都只是一千億元。噚日跌勢頗全面，美團（3690）繼續成為ATMXJ中最弱一隻。美國熱炒AI概念，喺香港相關股份未被帶起，資金對國內發展人工智能存有懷疑，一來因中美關係，冇最好晶片，一直都追唔上外國先進技術。二係全球都研究對人工智能作一定程度嘅監管，而中國喺呢方面嘅政策風險一定較高。

中特估概念股份跟隨大市跌，但唔同板塊跌幅不一，電訊基建股跌得較少，反而資源股因美元強同經濟憂慮下跌幅較大，煤炭股同石油股為重災區，兗礦（1171）單日跌9％，三星期已累跌20％，一直硬淨的中海油（883）同中石油(857)都被沽售。依家市況開始所有板塊都洗，內房股跌就唔係今天嘅事，但連中海外（688）、華潤（1109）都連日下跌，板塊中最好嘅都失守。恒指依家18000邊，距離預期支持17700差唔遠，太平地後或者有一個小反彈，但始終跌市中，要搏一定要細注，嚴守止蝕。

美國債務上限問題開始表決前，美股偏軟，道指跌130點，納指跌82點，NVDA回吐5％，中資股指數微跌。踏入6月，市場又重新關注會唔會再加25點子嘅問題，美匯104.14，日圓139.13，英鎊1.244，人民幣離岸價7.12，仍未有彈力。中國PMI數字差，紐約期油進一步下跌至67.6美元。