噚日期指結算，港股先跌後回穩，上午美元兌人民幣上升穿7.1水平，中港股市再挫一挫，上證A股一度跌穿3200點，午後回升上3220收，又開一枝長腳，市場可能炒人民幣跌得太快，阿爺又有機會開聲，上證係咪跌完言之過早，企得穩3220先再諗。國內深成指同科創板都轉跌為升，亦帶動香港科技股回穩，恒指結算日低見18369，午後跟國內股市回升，連跌四日後，恒指收18595，倒升45點，但係成交只得945億元。恒指噚日低位開了枝十字星，如果喺大成交下，有機會或見短底，但成交太少，指向性就唔大。指數跌咗千幾點，成交都一樣少，仲未吸引到資金入市，就算反彈，力度都唔會太強，信心唔夠，先睇住成交同人民幣匯率做人。

科技股日中都要跟市跌，騰訊（700）低見307元，收316，250天線失而復得，睇下騰訊呢條牛熊分界線係咪守到。科技股業績後，百度（9888）同快手（1024）算係最強，後者噚日更大彈6％，其他都已跌穿近期低位。近期美國正熱炒AI概念，百度同商湯（020）跟升，快手上市後首轉盈，呢個概念機會支持短線跑贏其他科網股，除非佢又成為騰訊下一個沽售對象。

美國兩會正將通過債務上限恊議嘅時候，有議員企圖阻止議案通過，可唔可以交到眾議院表決仲存有變數。美股個別發展，道指尾市跌幅收窄至50點，納指升40點，主要係晶片股帶動。

美債息回到3.7厘，美匯104.11，日財金官員話關注日圓走勢，日圓反彈上140樓下，人民幣冇起色，今早報7.093。憂慮經濟衰退，紐約期油失守70美元。

美國中資股指數又跌3％，巴巴（9988）折合只得77港元，拖累夜期和黑期跌至18330水平，預期恒指早市低開260點。