港股噚日開高少少後連反彈力都冇，弱即係弱。上證升9點，傳統股份頂住，話反彈都可能太早，只可以講係跌後橫行，但係深成指同科創板就跌近1％。港股進一步下跌195點至18551，成交1100億，英美噚晚冇市，淡友冇後顧之憂下沽到18500至18599嘅牛證重貨區，早前講話月波幅數據平均會有1500點，遲遲唔行，終於月尾先行出方向，今個月高位20300，以噚日收市計波幅已1800點，已滿足要求，今日期指結算，聽日黑期結算，估計未必會再大幅下跌。恒指由現水平至17700已無位可睇，可以隨時見底，亦可以跌穿正式打破預期下一升浪嘅可能性，只有等市場先生教導。

恒生科技股指數亦都好聽話，上周五失守3750支持，噚日高開，最高3751，就即刻再跌低收3647。大型科技股走勢一樣，只有百度（9888）可升2.7％，騰訊（700）先升5元，倒跌9元，京東（9618）再創香港上市新低，美團（3690）業績勝預期，但股價就遜預期，大跌8％至115.8元，有啲大行有調低其目標價，但大部份都維持喺170至200元間。

噚日醫藥生科股都係另一個被沽售的板塊，記得兩星期前康傑寧（9966）旗下一隻抗癌藥並未達到預期效果，要繼續研究，消當日股價跌兩成，拖累生科股有一個小小股災，依家已累跌四成。噚日又有一隻康諾亞（2162）跌24％，因為有一隻藥物被監管機構要求要多交大樣本人群數據，市場氣氛差，乜都可以成為沽售理由，其他藥股都要跟跌。

美國假期美股休市，美期先升後回軟，債務上限問題暫告一段落，焦點又回到息囗同經濟走向。美匯維持喺104.3，非美貨幣變動不大，人民幣7.08，人仔唔彈，中港股市都難有起色。