中港股市承接弱勢再跌多一日，亦終於行出咗方向，上證A股跌41點，收3204，終於去到3200邊嘅支持，圖表上已經穿穿地，先唔好講上面3400雙頂阻力重重，下望支持位究竟喺邊，以上年十月尾低位起2885計，成個升浪調整0.382為3214，已經到咗，0.5就會見3150，再失守隨時free fall 到3030。

港股真係同前兩個星期一樣，星期一升完就連跌幾日，今個星期一升完二百幾點後，兩日已累跌563點，今次穿19500就向下走，當然在上證下跌幫助下，無形之手已經消失咗，依家全世界都睇今年3月低位18829啦。科技股，中特股全部受壓，快手（1024）有多間大行調升其目標價，能逆市微升。濠賭股旺丁不旺財，市場炒衰退，資源股繼續下跌。

聯想（992）噚日中午公佈業績，上午已先跌，中午收市跌幅收窄，到業績出爐後午後跌至接近低收，全日跌8％。聯想至三月全年盈利跌21％，不過以三月結嘅第四季則少賺72％，經調整盈利跌44％，多過市場預期嘅32％，而第四季電腦同硬件銷售都下跌33％，成份業績較市場預期差，且沒有特別亮點。

小米集團（1810）公布，截至3月底止首季業績，股東應佔盈利42.04億人民幣，嚿年同期虧損5.88億元，每股盈利0.17元。根據非國際財務報告準則計，淨利潤為32.33億元，按年增長13.11%。其中包含智能電動汽車等創新業務費用為11億元。整體毛利率達到19.5%，創歷史新高。

美國短期國債孳息同債息率繼續上升，反映市場對債務上限問題不安，美股繼續下跌，道指跌255點，已連跌4日，納指跌76點。中資股指數跌2％，小鵬（9868）首季交付大跌5成，ADR跌5％，蔚來（9866）更跌9％，只得理想（2015）頂到。

美匯升上103.89，英鎊1.237，日圓上到139.3，人民幣7.064，市場繼續避險，比特幣跌至26400美金，現貨金1958美元。