歐洲最新嘅採購經理指數44.6較預期低，市場都預期有衰退，全球最強嘅日本股市前日高見31100後開始調整，噚日收市日股黑期都跟中港股市進一步向下。早前大家跟股神投資日本股市，日股上升，消失咗二、三十年終於有點起色，但日經指數升得頗多，兩個月升超過14％，依家拋離10天同20天線都有3至5％，如果要入場最好等10天線先考慮較安全。

中港股市升一日就冇後續力，上證A股一棍又插穿上升支持，收3246，跌50大點，下面又繼續睇今年嘅長期支3210至3220水平。港股暫時跟到前兩星期走勢，升一日跌幾日，彈力愈來愈弱，加上日內美元兌人民幣又升上7.06，恒指噚日又掉頭跌穿19500，成交860億元，成交太少，都未敢確定是否行出咗方向，隨時又挾你百零二百點上去。依家情況係基金唔願加倉，散戶心死離場，陰乾情況唔知要等到幾時。

科技股全部高開低收，除咗快手（1024）之外，逆市升3％，但相比高位升幅都少咗一半。前晚美國科技股有炒AI概念，香港嘅概念股一啲都跟不上。中特估亦全面回落，前日上升嘅電力同綠電股無以為繼。鍾南山預期未來兩個月國內會有另一波疫情高峯期，疫苗股有輕微追棒。

阿里健康（241）公布至今年3月底止全年盈利5.33億元人民幣，每股盈利3.95分，唔派末期息，去年度虧損2.66億元。

除歐洲外，美國上月製造業PMI都下跌至50樓下，處於衰退邊緣，加上債務上限問題仍未有着落，下月中到期嘅美國國庫券孳息率升至6.15厘，美股三指數借勢回落，道指跌230點，納指跌幅更大，跌160點（1.2％），蘋果和微軟跌1.5至1.8％，Zoom收入下跌，跌8％，中資股指數跌2.5％，外圍恒指已跌至19300水平。

美匯103.4，歐元失守1.08，日圓138.5，人民幣7.06，繼續低位徘徊。