G7開完會，未有太多言論衝住中國嚟，只係話關注台海和平，消息指短期內中國商務部會到美國傾偈，而拜登都突然話中美可能融冰，係咪有一啲事已經發生緊而不為外人道呢？

外圍股市反覆，最強嘅日股都要唞氣，國內股市以接近支持位開出，由跌轉升，但去到20天線（3010）見有阻力，希望佢可以慢慢向上，穿20天線後企穩，對港股都有幫助。

至於港股，過去連續兩個星期一都突然咁上升，跟住連跌幾日，周線低收。噚日都講，上周五跌穿19500，淡友竟然冇多踩一腳，外面8成人都睇淡，噚日最低19410，立即反彈，19500下面好似有無形之手頂住咁，噚日又係星期一，又嚟一把神經刀，最高上到19800，收19678，升227點，成交仍然千億樓下，市場深度不夠，要舞高弄低幾百點相對較易，依家10、20、50同250天線集中喺200點之內，已冇咩指標作用。由今年高位伸延的嘅下降阻力依家喺20000點水平，要升穿先可憧憬有升市機會，否則最好都係橫行，上不破，下不穿，繼續等。

人民幣噚日低見7.016，港股收市時已重上7.04，人民幣弱，對內銀、內險、內房都唔好，所以噚日升市中，內銀只微升，內險內房冇份，中特估只有中移動（941）有貢獻，科技股同車股支撐大市，電車三儍同比亞廸（1211）分別上升3至5％。

快手（1024）首季虧損收窄至8.76億元人民幣，2022年度同期虧損62.54億元。而Non GAAP盈利為4200萬，上市以嚟首次錄得盈利，期內活躍用戶同各項收入均有高單位數至雙位數增長，而公司亦會開始回購最多40億元股份。股價噚日已反彈7％。

美股繼續受債務上限問題影響，道指跌140點，共和黨要拜登政府減少開支，免得到佢地上台時冇錢用。納指反升67點，大型科技股繼續強，成了資金避險場所，Meta 被人罰錢都照升，電車股中，Tesla升5％，美光被中國下令停買其產品，收市跌3％。

聯儲局又有官員話息囗仲有得加，10年息升上3.7厘，美匯103.22，日圓138.5，而人民幣企在7.045。