國內股市反覆，上證A股升13點，仲守得住條上升支持，但就未見有力再衝高位。港股都係，前日大陰燭落，19500關口邊似穿嗰時，結果又守得住，騰訊（700）業績後早市最多跌13元，佢嘅業績冇驚喜，之後慢慢收復失地，只係跌0.8％，巴巴（9988）業績前升2.7％。自上個星期二開始調整嘅中國特色經濟股份噚日一齊反彈，令恒指又一次守到19500，以電訊同基建股表現最好，恒指收19727，上升167點。港股上周一後，8日內只開過兩支陽燭，大部份時間都係高開後回落，高位冇人肯跟入，冇承接力，簡單講基金又好，散戶又好，睇到咁少成交，都唔相信個市有力上。而且睇到人仔日中去到7.05，對股市一定有影響。

巴巴（9988）至今年三月第四季轉虧為盈，賺235億元人民幣，去年同期虧損162億元。而全年盈利725億元，上升17％。並通過以股東分派方式，分拆雲智能上市，分拆前會先引入策略性投資者。業績後巴巴ADR股價下跌，折合84港元，其他中資股大部份下跌，中資股嘅金龍指數跌3.5％。

美股反覆下繼續上升，道指中段下跌200點，尾市回升115點，納指再升188點，資金繼續追捧幾大科技股，聯儲局官員又出來放鷹，話加息未必會停，美十年債息抽高至3.68厘，美匯升上103.5，歐元1.0775，日圓138.5，而離岸人民幣最新為7.05。美匯升，現貨金跌至1960美元，紐約期油72美元。