仲記得唔知幾時，恒指同日經指數都喺同一水平，噚日日經指數已上到30000點，有股神欽點，加上日本持續放水，而恒指就上20000點都難。依家全世界都處於交叉點中，好多基金經理都睇唔出方向，單睇美股，游資竟然選擇泊去幾大科技股身上，估計都係因息口見頂，AI概念下未來可能仲有增長空間，其他行業會受經濟下行影響較大。況且又到幾年一度嘅國家債務違約嘅連續劇，今年都唔知係第幾季，政客都係見人講人話，喺唔做罪人嘅情況下爭取最大利益，所以長期違約機率應該不大，死線前妥協機會最大，而幾日違約機會都存在，但有一風險就係某啲債劵基金如投資出現違約就要沽出，到時債市可能會有小動盪。

中國經濟都未見得好，前日出嘅經濟數據已得知一二，阿爺曾放水，但錢流到邊度，除咗部份喺股市炒中特估，同埋借畀內房救亡之外，銀行新增借貸未有太多增長，其實銀行有水，好多商家都冇能力借，除咗國內經濟前景不明外，亦都會憂慮國外訂單因衰退而減少。

噚日亞洲區時段美元兌人民幣升穿7算，多數對股市不妙，上證指數未有太大反應，只跌6點，深成指都係跌8點，但港股就真係差，唔怪得股民日日都媽媽聲，科技股全高開，恒指只平開已夠衰，午後跌勢加快，A股收市後跌得更快，將星期一升幅全部吞噬，恒指跌417點，低收19560，大波幅下成交都只一千億，個市深度唔夠。科技股全部高開低收，美團（3690）跌3％最多，中特估亦都跟跌，內險、內銀同基建重機股受壓。騰訊（700）旗下雲業務減價，中移動(941)跟住減，跌市搵借囗，雲業務佔後者收入極少，中移動去到前日講嘅初步支持64.3，個市如跌，一定守唔到。

至於恒指，星期一預期跌又唔跌，噚日反手插穿250天線低收，日前講嘅保守策略一下就失守，依家19500已岌岌可危，收穿好大機會要去到19200，甚至18829。

騰訊公佈首季盈利258億元人民幣，按年升10％，Non GAAP盈利325億元，升27％，同預期相約。期內遊戲、廣告同金融科技三大業務都有增長。

美股受咗消息搖擺，依家最樂觀話今個星期可擺平債務問題，金融股反彈，三大指數同升1.2％，道指升400點，納指升150點。美匯102.9，日圓跌到137.7，人民幣7.0147。

外圍恒指重上19700水平，巴巴（9988）同百廣（9888）ADR回升88同128港元，但係人仔同成交都弱，最驚開高又再下試19500。