國內噚日來一個單日轉向，上證A股上午連初步支持3260都跌穿，低見3235，但午後嚟一個大反彈，而且升勢仲好全面，上證竟可重上3300點樓上，倒升38點，深成指升173點（1.5％），連創業板都升2%。

港股一樣，上午仍死氣沉沉，大家覺得指數冇跟夜期跌已經好好，守得住19500，上午業績前科技股拉上，中特估仲係受壓，午後中特估跟上證指數反彈，主要升內銀同內險股，科技股就繼續向上，恒指奇蹟地一度收復20天線20011，最後得而復失，恒指收19971，升343點，成交千億元，個市仍然係冇錢。恒指就繼續在區間上落，細成交，追貨嘅人一定不多，最怕你一陽一陰冇方向，旁觀者較多。

上個禮拜京東（9618）公佈業績比預期好，績後抽高，今個星期有騰訊（700）同巴巴（9988）業績，係挾淡倉定係炒業績，我冇水晶球。恒指噚日重上250天線（19700）上，只有等大市教導，保守策略唯有等後抽到接近250天線時小注一搏，19500都失守就要離場。

內房股繼續走軟，今次輪到合景（1813）被指有一億美元債務違約，跌11%，預期繼續會有民企開始違約，而被踢出國企成份股嘅碧桂園（2007）就跌4%。

美股喺債務談判前反覆向好，納指升80點。中資股指數急升4%，百度（9888）折合124.8港元，巴巴86.6元，而恒指夜期再升逾200點，黑期最新報20200，升230點。美匯102.42，日圓弱至136，人民幣6.96。紐約期油71美元，連同其他商品價格一樣，上落唔大。