美國距債務違約最早期限只得三個星期，當然估計拖到7、8月都可能解決到，只係大家互相爭取籌碼。美股繼續反覆，上個禮拜五，先升百點後倒跌200點，道指收市只跌9點，連續兩日觸及50天線都出現支長腳回升，暫時有少少支持，但美金回升對股市有不利影響，半年內道指仲走唔出32500至34000嘅橫行，所以如果33150失守，有機會又要試32500支持。

納指仲係貼近近期高位行，暫時都仲喺嚿年9月同今年2月高位阻力12270水平反覆。中資股嘅金龍指數隨上個禮拜五香港科技股高開低收下，下跌接近3%。近兩個月美股有一個趨勢，就係升幅主要嚟自少於一成嘅股份，特別係幾大科技股，隨咗因業績好過預期關係，亦因為息囗已見頂，所以資金都泊咗喺呢類股份身上，亦以指數同其他工具估對沖。大股企到高位，中小型股不斷下跌，究竟邊一個板塊係真實反映美國依家經濟狀況，會係中小型股股值收復定係大股企唔住要跌，都值得思考。

美息尾市向上，美匯升上102.71，非美貨幣回落，美元兌日圓升上135.75，兌人民幣6.9711，再廹近7算。商品期貨回軟，現貨金2010美元，紐約期油險守70美元。

京東（9618）業績好，同其他科技股一齊高開都拉唔起港股，暫時個催化劑效力不大，皆因港股已開始兩極化，喺冇新錢下，科技股跌，錢就去炒中特估，到科技股彈，中特估就回吐，而指數就繼續陰乾向下，外圍恒指已跌穿19500支持，要睇港股今日開市有冇腰力，上個禮拜五見電訊、內銀內險同基建股繼續回吐，中移動（941）收復唔到20天線就要繼續向下，如果市況弱有機會試64.3元支持。內銀內險基建星期一急升後都連跌四日。另外有一個小小主題，就係上個禮拜三起見美匯升，環球資源價格同本港大部份資源股都下跌，市場好似開始炒衰退概念，中國經濟復常後未有如預期增長那麼快，4月已開始回軟，外圍經濟就更加處於臨界點，若然衰退，環球經濟向下自會令原材料和資源需求下跌。

恒指服務公司季檢決定加入京東健康(6618)、華電(836)、紫金(2899)同攜程(9961)，藍籌股增至80隻，下月5日生效。