噚日國內開「中特估」吹風會，對中港股市都未有刺激，國內股市反覆，上證跌9點，港股就繼續喺橫行區嘅弱方徘徊，恒指全日低位 19567，未穿19500，但走勢就似一級一級向下，加上市場冇水，900幾億成交下陰乾式下跌，雖然尾市指數跌幅收窄，只跌18點，收喺19743，但仍未走出困局，感覺始終唔太好，10天線19903，要升穿又唔難，買現貨只係搏。要扭轉短期弱勢最好盡快重上20000點上，升穿20200就更好。

「中特估」概念股份繼續調整，中移動（941）今年喺3月底曾經第一次跌穿20天線，幾日後就收復，依家再跌穿，收復唔到或者會試更低位支持。

理想（2015）第一季業繼續靚仔，並預期第二季交付同收入更勝首季，股價大升17%，其他電動車股則只微升。

幾大科技股平開或輕微高開後又跌過，尾市跌幅收窄，未來幾日會陸續公佈第一季業績，除咗騰訊之外，大多都較高位跌咗三至五成不等，近日見開始有喘定走勢，只等一個催化劑觸發反彈。

京東系公佈第一季度業績：

京東健康（6618）首季收入升54%至139.5億元人民幣，經營溢利7.95億元，升11.9倍，Non GAAP盈利11.57億元，升1.08倍。期內用戶同日均問診量都上升。

京東集團（9618）公布，截至今年3月底首季股東應佔淨利潤62.61億元人民幣，嚿年同期虧損29.91億元，Non GAAP 盈利75.91億元，升88%。業績較市場預期為好，京東ADR股價上升7%，折合147港元，較噚日香港收市升12元。

京東業績帶動中概股上升，巴巴（9988）同百度（9888）ADR股價分別升上約86同121.5港元，亦帶動恒指夜期上升133點。

美股方面，上周新申領失業人數上升至26萬，地區性銀行存款下跌，加上聯邦債務問題，共和黨唔肯就範，道指全日受壓，收市跌221點，納指微升22點，幾大科技股繼續頂住個指數。美匯升上102，英鎊歐元回軟，人民幣走弱，去到6.96，可能對中港股市有多少負面影響。