上證A股噚日初段延續升勢，衝到上3418，距噚日提到初步阻力3424只差6點，中午收市都企到3400點上，午後返嚟就唔知發生咗咩事，倒跌37點，去到3357，衝頂唔成就掉頭回落，又跌返上升通道中，升勢未逆轉，只能視為調整，明顯下跌理由就冇乜，人民幣輕微回軟，有話係中國趕走加拿大駐上海領事導致下一輪外交風波，有話係國內會舉行股值收復研討會，會有金融機構同領導人參加，有人趁早獲利。

港股早前只係靠「中特估」股份頂住科技股弱勢，只係期望舊經濟股份回落時，科技股可以接力，重磅股可幫手拉起指數，結果中特估炒到內劵股就熄火，午後跟隨A股跌，科技股沒有如期望接力，反跟隨大市下跌，結果恒指一個下午跌逾300點，低收19867，全日跌429點，成交增至1220億元。恒指逆轉咗近期穩步微升嘅走勢，但仍處於收窄三角形內，自三月中起仍維持反覆橫行格局，暫時未算有方向，仍要觀察，上面阻力維持在203至20400水平，下面上升支持19800，250天線19709同近期嘅兩個雙底19520都係主要支持所在。聽日開始會有大企業公佈第一季度業績，京東（9618）打頭炮，幾大科技股中騰訊（700）跌幅3.6%最大，商湯（020）同中芯（981）一齊跌7%，前者前日被MSCI拒絕納入其指數成份股中，兩日累跌了13%。濠賭股自5.1後開始腳軟，賭收回升後趁好消息出貨，銀河（027）已連跌5日，重回3月中水平。

噚晚美股繼續反覆下跌，納指跌0.63%，而道指則微跌0.17%，大家都等今晚通脹數據，摩通繼續唱啖，大型科技股向下，而中資股指數就追回港股昨日跌幅而下跌2.3%。

美匯101.61，英鎊相對歐元強，日圓165水平反覆，人民幣6.9235。現貨金升上2038美元。

外圍恒指今早回升逾百點，重上19950水平。