2023年06月7日

上周末股神巴菲特同芒格主持嘅股東會中,同大家分享咗佢嘅投資策略,同埋佢對經濟中期嘅睇法。首先股神表示美國超過十年嘅經濟incredible  period相信已經完結,而美元作為儲備貨幣狀況未來會存在更多不確定性,但係要知道巴菲特睇嘅係最少5至10年發生嘅事。至於投資操作中,首季買入多10億美元嘅西方石油(OXY),會繼續增持,但就沽出60億美元嘅雪佛龍(CVX),所以佢並非一直睇好油價,只係板塊內股份調整啫!而睇好再生能源,好似風電同光伏。佢表示有減持台積電(TSM),但佢相信台積電未來十年都係一間好公司,只係唔鍾意中美現時狀況。蘋果仍然會係佢組合內最好嘅公司,而汽車業佢就覺得會非常艱難,5至10年內會出現嚴重嘅汰弱留強情況。

上證A股急升60點,收3395點,重上兩星期突然急跌前嘅高位,來回地獄又折返人間,下一阻力為去年中高位3424點。上證上升,都係靠內銀內險同近期嘅「中特股」帶動,新經濟為主嘅深成指只升0.4%。

中美股市大升下,港股都唔係好有力,皆因幾大科技股繼續拖住後腳,同上證一樣,中字系就強,內銀油股飛天,內險、基建、電訊穩步上,資源股上升,尤其係煤炭同鋼材,相反內需中邊爐股就逆市跌。恒指上升247點,收20297,成功收在20天線上,暫時扭到轉個跌勢,依家10、20、50、100同250天線滙集喺700點內,明顯喺度等方向,如果一眾科技股上,指數已經突破上去了,依家今年最新嘅下降阻力同100天線正處於20400水平重疊,指數MACD已轉強。近期科技股已止跌,喺低位好似有支持,睇吓可唔可以帶動恒指穿位上。

股神嘅投資旗艦巴郡喺5月2日出售196.1萬股比亞迪H股,每股平均作價235.64元,套現約4.62億元。最新持股降至9.87%。

加密貨幣交易平台幣安(Binance)兩度暫停比特幣提取,比特幣尾段急挫5.8%,低見約2.73萬美元。

美股喺公佈CPI前反覆下跌,道指跌50點,納指升19點。現貨金2028美元,紐約期沖73美元。債息微升,美匯101.39,英鎊1.26,日圓135.11,而人民幣仲反覆喺低位6.92徘徊。

今早消息,加拿大驅逐中國外交官,中方聲言反制,中加關係緊張。