上星期歐央行同美聯儲局一同加息25點子，後者共識已經係最後一次，而瑞銀亦預期歐央行7月多加一次亦會暫停。美國4月份非農職位增長23.5萬個，預期係18.5萬個，但3月嘅數字則由預先嘅23.6萬個向下修訂至16.5萬個，反映數字有延誤，所以4月數係咪咁樣好都要看事後嘅修定數字，如果連續兩個月都大幅向下修定，或者美經濟已開始回落喇！

美股道指上周連開4日陰燭後，上周五反彈回升546點，地區性銀行反彈，雖然前幾日大跌嘅PacWest同WAB都回升8成同5成，但只由4月尾高位計，仲要跌50％，距離3月股價更跌咗75％，呢個板應未脫離危險期。納指升逾2％，又升近上升三角形阻力，依家環球股市避險心態正上升，可唔可以衝得上機會都係一半半，而道指都未擺脫到上年11月起嘅橫行走勢，區間約在326至34200。

紐約期油反彈4％，重上71美元，現貨金跌30美元至2024美元。美匯101.28，英鎊升上1.264，歐元1.115，人民幣6.92。

港股行多一個星期，繼續維持反覆橫行局面，由3月到依家仍然都喺個收窄三角形內行，今個月恒指波幅只700點，肯定未滿足月內波幅要求，以最少千五點波幅計，今個月或會行出個方向。上周港股都係靠內險同內銀股頂住，而幾大科技股就好似喺低位築底一樣，若真係可以回升，就有助港股擺脫橫行之局。

滙控（005）分拆方案被否決，滙控最賺錢係亞太地區業務，若然分拆後對滙控作為母公司可能只有一次過嘅股價向上刺激，但長遠分拆後資金只會轉買子公司，而母公司已無價值，作為一個控股公司，股價更會長期低於市賬值。而香港嘅股票市場一向對控股公司嘅估值都不高，復星系如事、中信系如事，最後要體驗部份價值就只有行私有化嘅路，而私有化價錢亦一定比帳面值有一定折讓才對大股東有意義，所以損失嘅都只有市場上嘅投資者，最近期例子就有老牌藍籌股會德豐。所以未來巴巴（9988）若果真係把下面6大業務分拆上市而變成一間控股公司，就應該喺股價炒高時換馬至系內自己心儀嘅子公司喇！