美國加息25點子，市場共識應該係最後一次，但聯儲局官員始終未肯承認，囗頭上都話要觀察。市場就選擇唔信聯儲局，自己有另一個睇法，近三次一路加息，債息同美匯都慢慢向下，市場最樂觀係7月開始減息，今年會減三次，早前美股強勁某程度上都有反映下半年減息嘅預期，但以聯儲局肯以一定程度嘅衰退去換取通脹回落，七月減息可能性好微，9月都係唔大（除非有突發變數），年底開始減看似最合適，所以如果對比預期有出入，第三季美股可能會較波動向下。

美股噚晚繼續下跌，自從禮拜頭突破33860阻力未有承接並出現倒轉鎚頭後，已連跌3日，高息囗繼續侵蝕地區性銀行流動性，最新兩間高危的PacWest同WAB分別再跌50同38％，前者已表明正考慮賣盤或其他融資方案，存款肯定正流走，大銀行都難逃一跌，道指一度跌470點，埋單跌286點，納指跌58點。

國內股市重開，上證A股承接到假前強勢，低開後回升，高收3350點，科技股為主嘅深成指就跌64點，國內股市完美反映港股板塊走勢，內銀、內險、電訊、基建股全面做好，帶領恒指升250點，平保（2318）急升7％、中人壽（2628）升5％，三大內銀，建、工，中升4至5％。相反科技股就力度欠奉，騰訊（700）逆市跌，見高盛繼有沽盤，相信係南非大股東繼續出貨，應該減夠1％又會有公佈。

科指已跌至3月中低位，而恒指仍較當時高出一千點，可見科技股之弱。恒指噚日又上番250天線上，連日就喺度上下洗牌，有北水下成交千億元。科技股升唔上，指數都喺度橫行，而現時只可區間短炒，等重上20天線，依家只差200點左右，夜期跌45點。