FRB 最終被打包賣畀摩通，存戶受到保障，但就要被迫退市，投資者就血本無歸，試問其他地區性銀行股價點會唔跌。FRB就係因為存款流失，導致要高息借錢，到息囗負擔太大，頂唔住就要賤賣資產，又係同SVB一樣一環扣一環嘅不歸路。再者，依家係中小型銀行信心危機，可能有人掃高某某銀行CDS，已經好易觸發資金流走。聯儲局噚晚加息25點子好像已成定局，問題係會後聲明取態如何。

講番港股，恒指一開市就已經喺250天線（19718）下，全日低位19538，未有穿上周低位19520，恒指收番上19699，成交進一步萎縮至662億元，希望今日北水回歸下會做番好少少。恒指收喺呢個位，日線同周線都係弱，不過未有攞脫250天線水平反覆格局，最慘係有權上下反覆好幾次先行出方向，當然如果有幾日大成交跌落去反而覺得洗牌後可以入市，依家好似喺度折磨一樣，如果唔想被指數牽着走，寧願向個股埋手。噚日大市未致大跌，起碼見滙控（005）同比亞廸（1211）逆市上，尾市市寛稍微好轉，生科藥物股部份可止跌回升，呢類股份假期前已調整咗一段時候，要看今日國內股市復市後內地藥股係咪有動作。

結果聯儲局加息25點子，會後鮑威爾暗示加息進程會停，道指一度升近百點，其後講到今年未有減息空間下，即掉頭倒跌，美股收市跌270點，納指跌55點。佢表示美銀行體系仍健全，但整體銀行股繼續下跌。

耶倫多番警告美國最快會在下月一日出現債務違約，加上憂慮美國經濟陷入衰退，紐約期油失守70美元大關，最新報67.7美元。現貨金升上2061美元，美匯跌至101.1，日圓反彈上134.4，人民幣6.913。