市場等美國一連兩日嘅議息結果，加上冇北水（聽日先返嚟），港股好似無人駕駛咁，朝早有一消息指百度（9888）、微博等履行責任不力，未盡力監管有害信息，以為科技股會帶大市向下，遂不知指數高開20122後，一度衝穿20天線，升近400點，唔使半個鐘已倒跌，由全日低位19761，但又守到250天線，個市就係冇方向，但連續兩日高開低收，走勢並唔理想，至於噚日點解要開高，有咩消息，到依家都未有理由，只有想到係上星期五中央政治局會議上指出會重視通用人工智能發展同創新生態，推動平台企業健康發展。

恒指3月高位21005，低位18829，到依家仲未得出呢個區間，噚日成交縮到750億元，少得可憐，踏入咗五窮月，先嚟個窮成交額，恒指收19933，收市期指低水100百點。如果一定要玩指數，唯有20天線做淡，接近250天線做好，搏佢繼續區間橫行，升穿同跌穿即止，其實同去澳門冇分別，所以一定要細注。

滙控（005）首季盈利129億美元，按年上升2倍，恢復派季度股息0.1美元，並建議最多20億美元嘅股份回購計劃，市場反應暫時正面，業績公佈後股價升到58.65元高收，亦都幫忙頂住大市。

美股最多跌600點，收市收窄至367點，納指同樣跌逾1％。銀行股再度被沽售，市場對地區性銀行信心仲係好低，如噚日所講，小小事又會引發提款潮，噚晚跌得最勁係PACWEST，收市跌三成。繼芒格後，再有基金經理驚告商業物業會係下一個金融業炸彈。

美債息回落，10年債息跌至3.4厘，美匯101.8，歐元升上1.1，日圓136.57，人民幣6.9345。現貨金重上2000美元上，今早報2025美元，紐約期油跌至71.5美元。

承外圍股市下跌，外圍恒指跌穿19700，要睇今日守唔守得住，指數若收穿250天線，指數好倉應避一避。