微軟第一季業績真係對辦，每股盈利2.45元美元，升10%，預期2.22元美元。三大部門工業、雲端同個人電腦收入均超過上限指引，其中雲端收入升22％。AI人工智能適用於各項產品，仲有助推動業務全面發展，而公司亦表示第二季三大業務會繼續有增長，前晚微軟盤後已急升8.5％至299美元，帶起噚日亞洲區時段納期上升150點。相反地區性銀行FRC因存款資金流失太快，同埋早前借入逾千億美元，單係每月利息支出已4億美元，所以決定要出售資產套現，難免又有虧損。事件又發吼到其他地區性銀行嘅處境，有人救嘅FRC都要套現求存。而事件另一面又導致債息微跌，因為賭下月加息25點子嘅機率由95降至82%。

港股如預期反彈，但末有跟黑期低開下，好快已倒升，所以只係小注搏咗兩隻科技股，指數升穿19800已平咗一半，餘下嘅再以250天線（19725）作止賺，跌穿就走，睇下可以彈到幾遠。講番恒指，一枝大陽燭抽到上19900，重上250天線同擴散三角形底部上面，可惜未能竟全功，唯一唔好就係收回19757，縮得較多，以目前走勢確實未睇到方向，況且今日係期指結算，前兩日忽上忽落，極大可係是轉倉活動導致，所以今明兩日反而關鍵所在，如承接再上，或確認假跌破而繼續形態內行走，如掉頭再跌穿，則破位向下機會就相對很大。

騰訊（700）大股東Naspers終於開始喺市場減持行動，由於下月會公佈第一季業績，所以現在處於Blackout period，未能回購頂住股價。至於對美團，Naspers仍未有行動。

公司業績中，國航（753）首季虧損由89億元人民幣收窄至29億元，上海石化（338）蝕1.6億元人民幣，而海螺水泥（914）則賺25.5億元，按年跌48%。平保（2318）第一季盈利按年升49％至383億元人民幣，收入升28%。

美股個別發展，道指連跌兩日，FRC事件繼續發酵，未有白武士，股價再跌3成，而聯邦存款保險公司更考慮把其評級降低。微軟升7%，其他大科技股反覆，Tesla跌4％，納指升55點。銀行業處危機中，資金搵出路，比特幣曾一下急升上30000美元，好快就回，最新28300美元。美匯101.45，其他貨幣橫行，人民幣仍偏弱，最新6.94。驚衰退影響需求，紐約期油跌3％至74.4美元。