外圍股市冇方向，亞太區其他股市中又係中港股市自己最差，前日提過中國喺國際地位提升下，一定有人唔順眼，結果就一定又互相制裁，加上拜登又話要連任，爭連任就要做嘢，上周已話會禁止美資投資中國半導體，人工智能同相關科技行業，前晚再加碼，如果美國太陽能項目係用中國原材料建設就唔會得到補貼，呢類消息最影響投資者信心。上證指數上周五起連跌三日，噚日午後更一度跌近3220嘅橫行區間支持，反彈上3264收市，只係托住舊經濟股份頂住，科技股為主嘅深成指就彈唔起，跌1.5％，滬深兩市南水合共淨沽出50億元人民幣，成個升勢已經破壞咗，依家就要等佢幾時見到支持出逆轉。

港股更弱，接近平開後就反覆向下，結果就連250天線同成個擴散三角形底部都跌穿，圖表上已經轉弱，陰非好快可以開一枝有力陽燭重上250天線而且企穩，仲可以視為假跌破。但一眾科技股已跌得幾殘，自己睇今明兩日有機會出反彈，要搏只係可以短炒，贏輸都要計數離場。

公司業績中：

華能（902）首季虧轉盈，賺22.5億人民幣。

中鋁（2600）首季盈利跌一成至18億元人民幣。

美股跌344點，金融板塊受壓，FRC首季存款流失大過預期，並指其有意出售千億美元資產自救，即又要蝕賣，事件令美國其他地區銀行股都被沽售。大科技股業績前納指跌逾2％，結果微軟盤後公佈首季盈利升9％，好過預期，而GOOGLE母公司都話會用700億美元回購股份，美股盤後企穩。

美匯101.8，美元兌人民幣急升上6.94，美十年債息回落到3.4厘。現貨金2000美元，紐約期油77美元。

外圍恒指下跌至19480，預期今日恒指低開約150點。