中港股市follow到上星期五嘅弱勢，低開後反覆向下，上證A股連續開兩枝陰燭，好好地慢慢升上來，兩日打回起點，股友都話難怪上證咁多年都喺3000點上落。噚日已跌至低位拉上嚟嘅上升支持（3270），失守又要回試今年二、三月嘅橫行支持3220。

科技股帶住港股再試低位，恒指最低見19735，啱啱好就係250天線所在，收19959，跌幅收窄到116點，成交千億唔夠，係咪代表調整完成就未知，但就引證咗點解上星期講恒指上星期二做十字星，兩日內都升唔上較大機會失去動力，掉頭跌穿20天線就要走，要捱多400點唔值搏嘅操作。究竟依家港股後市點走，試下由4月初開始睇，恒指月初到依家，高位一個比一個高，低位同樣一個比一個低，似行一個擴散三角形，而噚日擴散三角形底部差唔多就喺250天線附近，如果指數跟住形態行，波幅會擴大，噚日已中了250天線和擴散三角形底部，如要企穩，最好盡快重上保力加中軸（即20天線），反之向下突破嘅話，好大機會三月低位18829都會失守。

個別板塊中，TESLA 上周減完價又將部份車款價錢上調，香港上市嘅車股得以喘氣逆市企穩，比亞廸（1211）上升3.5％，三儍都逆市升。如果新能源車市場繼續減價競爭，市場好快開始進入汰弱留強局面。電車板塊嘅題外話，智利政府決定將國內鋰工業國有化，所有鋰合約唔會續期，當中包括天齊（9696）持有嘅SQM，天齊股價噚日下跌。鋰價近一年內喺高位下跌，Tesla可能因為咁預期電池成本下跌而令公司有減價空間去爭取市佔率。另外國內有電池廠開始研發鈉離子電池作為鋰電池嘅替代品，前者成本較低，且低温同快速充電性能更好，若成功對天齊等鋰企業都係一個打擊。

美股反覆，靜待今個星期嘅GDP同個人消費數據，另外幾大科企都會喺今周公佈首季業績，納指下跌35點，而外圍恒指跌80點。美匯101.28，其他非美貨幣變動不大。