上周五好明顯係國內股市拖住港股下跌，上星期四完美守到嘅10天線，結果午後一下就穿咗，就連20天線都不保，一下子又去翻3300水平，深股通同滬股通等北向資金都出現淨流走，至於國內股市點解大跌，想同拜登一句將美資企業投資中國嘅科技、半導體同人工智能等行業有關，美國打擊中國科技發展已經唔係今天嘅事，但中國開關後，緩和沙特伊朗關係，隨後東盟國家、巴西、法國嘅最高領導人相繼訪華，跟住其他人又提倡去美元化，人民幣喺國際舞台上使用上輕微上升，美國一定睇唔過眼，一定會加大制裁中國力度，市場的確有啲憂慮中美關係會惡化。其實美元地位要淡化，中短期確難做到，人民幣要走到國際舞台，一係資本賬要開，二係要一定程度上自由浮動，亦都短期難以做到，況且世界上其他國家雖然口頭上去美元化，實質如果關乎自身利益關係，又會左搖右擺，掉頭親美都得，所以不能盡信。

港股自己跌又好，跟國內股市跌又好，結果就係跌穿咗20天線，按策略上周五跌穿20200就先行離場避一避，始終如果要試250天線，下面仲要多捱400點，恒指細成交下收20075，而夜期同黑期都冇起跌，連續兩日市寛都較差，今日點行真係難估。強勢嘅中字股都回，科技股就更弱，騰訊（70）跌到50天線，巴巴（9988）補裂囗後再落，京東（9618）跌到去年10月底低位，當時恒指15000點樓下，相對較弱可能京東同人工智能扯唔上關係有關。

公司業績中：

中興通訊（763）首季盈利26.42億人民幣，按年升19％。

長汽（2333）第一季盈利1.74億元人民幣，按年跌近9成。

美股受制喺2022年初高位36950伸延下來的下降阻力，衝唔上，怕佢出回吐，上周五仲可微升22點，唯其他指標力度轉弱。美債息反映聯儲局下月再加25點子機仍高，十年債息3.58厘。美匯101.72，歐元升上1.1，日圓134.2，人民幣6.899。現貨金失守2000美元，加密貨幣下跌，風險資產壓力，比特幣跌至27000美元。