美股進入業績期，近期美股同港股都有一個共通點，就係成交少。睇返公佈咗業績嘅美企，大部份都好過預期，但我相信呢個只係同預期定得過低有關。Tesla決定犧牲毛利率繼續減價去搶市場佔有率，呢個係行業特性，為嘅係保住未來市場領導地位同定價權。

上證A股果然要試十天線支持，但同預期劇本就有出入，簡直有神之手嘅操作。噚日上午跌到3344點，即十天線位置，一點都冇少，午後慢慢回升，收市3367，只跌3點。

港股全日164點上落，好似冇心跳咁，成交只得一千億，下星期四已經係期指結算，圖表上幾條大平均線10天、20天、50天同100天已集中喺200點內，通常呢個情況市況好快會行出方向，喺唔失守20天線下，仍然較為偏向看好。

恒指噚日能夠升29點，全靠滙豐（005）、中人壽（2628）同平保（2318）三隻頂住，科技股大部份走軟，成個板塊都被投資者減持消息籠罩住，騰訊（700）減完京東（9618）、美團（3690）後，噚日披露了上星期已場外無償派送咗5100萬股快手（1024）比外部伙伴，接貨者會否喺市場沽貨就不得而知，只係騰訊動作令人感覺到會逐步沽出快手持股，快手跌5％，而騰訊持有嘅嗶哩（9626）噚日都顯得有壓力，唔知幾時又會成為下一個減持目標。依家情況係好多原始股東一直喺度減科技股，另外自己人都係減持喺其他企業嘅投資（呢個可能同國家政策方向有關），感覺上𢦓個板塊喺度轉荷官一樣，重新派牌，最後貨源落喺邊個身上，需時幾耐，都可能會拖住科技股升勢，始終漸指數比重頗大。另外上星借融創（1918）復賽炒過一轉嘅內房又差不多打回原形，昨噚日下跌都有兩個因素，一係LPR冇再下調，二係越秀（123）作為幾隻優質內房股，都要向股東伸手，100供30，每股供9元，市場驚一驚，大都要伸手，小型嘅位怎麼辦。

噚晚美股反覆回落，道指跌200點，納指跌128點，Tesla業績差加再減價下，股價大跌一成。紐約期油77.3美元，油組減產後升一下就重回原地，憂慮經濟衰退令需求減少。現貨金2015美元。美匯101.85，人民幣6.884。