噚日中港股市一齊跌，邊個拖累邊個就唔知道。上證A股最後一個鐘跌20點，全日就跌23點，跌幅0.6％，科技股差多少少，深成指跌0.8％。A股今個浪由3220起步，最高3396，國內股市近期成交顯著上升，而且融資融劵活動亦開始多，暫時相信短期回吐，最佳劇本係用幾日等10天線上嚟，𠄘接再上。

港匯走弱，又再觸及弱方保證，港股就較差，科技股拖累下噚日收市跌穿10天線20438，同噚日提及的20374同20379，恒指未有喺做咗一個十字星後再上，反而向下，勢頭唔好，好彩條上升支20290同20天線20123暫時仍未失守，20天線已係短線最後防線，因為250天線喺19776，跌穿20天線有機會要捱多400點，成本太大，做好嘅寧願等佢重上20天線後再做過。

科技股帶住個市落，其實消息就欠奉，成個板塊自己走弱，前晚NETFLIX 收市後公佈首季業績，新客戶增加175萬人，比預期同上季都少，預期第二季增長會更少，佢盤後曾一度跌近一成上番去，應該到正本戲先見真章。亞洲區時段道期同納期都回落，係港股預早反映美科技股業績對納指嘅憂慮，抑或係外資輪住減持科技股嘅心理因素影響就未知。ATMXJ中就只有美團（3690）可以逆市企穩，市場比解釋係美團日前辦嘅直播帶貨令外賣生意大升，百度（9888）正考驗250天線126.3嘅支持，不宜失守。快手（1024）市傳中央結算多咗5000萬股，又驚被人減持，所以噚日股價算係最弱嘅一隻。

Tesla公佈第一季盈利，稍微較市場預期為差，加上再公佈減價促銷，盤價盤後交易時段跌至170美元。美股整體都係橫行，道指跌70點，納指冇起跌。美匯101.94，離岸人民幣6.893，英國通脹仍然高企，要繼續加息，鎊匯會有支持，其他貨幣變動不大，美匯喺支持位反彈，料只屬短暫，中長線下行壓力未減。紐約期油78.9美元，加密貨幣中，比特幣急跌5％至28700美元。