國內噚日公佈今年首季GDP同比上升4.5％，預期為4％，而前值為2.9％，另外工業生產同消費指數都做好，上證指數先跌後回穩，午後慢上，收3393，升7點，仲維持到強勢，當中資源同金融股做好。

港股急抽一日後轉窄幅橫行，全日波幅不足200點，扣除安踏（2020） 117億元配股上板後，成交只得千億元。大市升一日後整固，連續兩日企得喺50天線上，形態仲係向好，只係太少成交同冇波幅下，對炒家難免有啲磨減鬥志。至於短期策略都一樣，10天線20435，今個星期開20374，今個月開20379，如果係升市，周同月線應該唔會開陰燭，所以呢幾個可以作為參考位，唔應該失守，上面繼續睇21000，指數邊一個位開就要睇個人自己可承受嘅風險度數。恒指噚日做咗個十字星，照計要上，今明兩日係最好時機，拖得太耐怕動力會減退。

科技股偏軟，騰訊（700）升一日後噚日一度跌十元，唯一好嘅就係前日低位360.4未有失守，最好盡快收復20天線368.5。騰訊同美團（3690）陰影都係南非大股東手上待沽嘅股份幾時出手。電訊股尾市有少少腳軟，個市係靠內險股頂住。安踏（2020）配股後險守配股價。

外電指，中國當局正研究下調對螞蟻嘅罰款由原先嘅十億美元至7億美元，嚟完結對集團過往違規行為嘅整改。

投行高盛公佈首季盈利跌19％，每股賺8.79美元。比預期8.21美元為高。美銀盈科升16％，每股盈利0.94美元，亦較預期0.83美元為高。

美股反覆下收市原地踏步，三大指數幾乎冇起跌，大行對美股睇法中長期係跌，短期會彈。美匯101.72，如能跌破100心理大關，對環球股市有利，日圓134，而人民幣6.876。現貨金重上2000美元，紐約期油81美元徘徊。