上星期都唔只一次講中港股市算係強勢，喺預定止蝕位下適宜跌就買，不宜做淡，結果噚日上證A股率先破位上，高收3384，升47點，下一個位就係3424，不過科技股為主嘅深成指就只升0.5％，力度未夠。

港股低開後就慢慢回升，上午大市只靠「中」字派股份帶動向上，好似電訊、內銀同內險股，科技股仲要下跌，午後科技股突然接力上，恒指升勢加快，全日升343點，收20782，成功升破上兩周高位20750的阻力，如早前講，企得穩下一個位先睇21000。科技股股下午發力，ATJ都升約1％，最靚係美團（3690），升4.7％，上面阻力喺146至148元區域。南非大股東收到騰訊（700）派出嚟嘅貨都仍未在市場有動作，除之前估計可能已一早做咗遠期合約外，亦可能做咗OPTION，收咗期權金，所以唔急於喺市場低價放售。大市成交升至1360億元，北水淨流入增至74億，流入最多都係舊經濟股份，包括中移動（941）同兩桶油。

消費股表現參差，飲食邊爐股升，但體育用品股就逆市下跌，安踏（2020）跌近4％，收市公司即刻喺市場以先舊後新配售1.19億股，作價99.08至102.27元，集資約122億元。

商湯（020）繼上周被軟銀公佈減持5000萬股後，噚日巴巴（9988）都披露上星期二以平均價3.45元減持4000萬股，價錢靚過軟銀。同日亦有僱員持股公司減持507萬股。

噚晚道指反覆回升100點，納指升34點，市場等今晚開始公佈嘅業績同經濟數據，三星計劃旗下生產嘅手機轉用微軟的搜尋器，Google 母公司股價跌2.7％。美十年債息升上3.6厘，美匯反彈上102.1，美匯去到上年5月接近100的低位開始見有少少支持，日圓134.4，歐元1.0925，離岸人民幣6.8828。

美匯升，其他資產相對較差，比特幣跌近1000美元，紐約期油80美元，現貨金1995美元。

夜期同黑期預示今朝恒指會低開至20650水平。