美國3月零售額按年跌1％，市場預期只跌0.4％，消費正在萎縮，經濟數據開始反映多番加息後嘅影響，依家停加息或多加25點子都只係一線之差，兩者分別都不大，市場對預知情況已一早反映喺指數內，而聯儲局對於下月應唔應該加息亦開始有分歧，市場關注點已落喺經濟放緩嘅速度同深度。美銀策略員指投資者應避開美股呼籲喺現水平減持，擔心企業盈利下調速度會較預期快。美股上周五反覆向下，道指跌143點，納指跌43點。

打頭陣嘅銀行股，花旅首季盈利升7％、富國升32％、摩通升52％，季度收入破紀錄，每股盈利4.1美元，較預期多兩成，摩通同花旗分別上升7.5和4.8％。

美十年債息回升上3.54厘，美匯101..54，非美貨幣回落，日圓133.79，英鎊1.242，而人民幣則由低位6.835回升上6.871。紐約期油82.5美元，而現貨金則回落到2017美元。比特幣企穩30000美元水平。

港股上周下試19800至20000點嘅重要支持，暫見有較強承接力，能單日回升已算好表現，暫時喺區間遊走，下面19800，上面20750，一千點內橫行，未出到方向，問題係依家市場未見有大量資金湧入，每日成交都處於低水平，資金遊走各板塊中輪流炒，早前炒完科技股後，上周就到藥股接力，到上周五醫藥生科板塊開始見升後在高位回吐，可能又要唞氣，而接力頂住個市就見又傳統「中」字派股份，好似中移動（941）同埋中石油（857），另外車股都蠢蠢欲動，聽日起至27日會有上海車展2023，車股有可能會炒一轉，車股中，最好一定係比亞廸（1211），銷量同盈利暫有保證，三儍中，理想（2015）較好，而吉利（175）圖表走勢似有機會突破低位橫行區阻力，止蝕9.8元，希望可搏到上11元。