上證A股企得穩，跌10點後中午前已收復失地，午後跌落去又收窄，收市跌9點，而家只有希望佢高位橫行後突破，到時港股都有運行。恒指就承夜期同黑期下跌後低開，低位19885，250天線19769守到，指數一開就差不多全日低位，跟住慢慢回升，暫時反映市底都算強，所以都係睇逢低買，定咗止蝕喺19800水平，愈低買成本愈少，唯有照策略做，問題係中港股市仍在升勢中，未見轉勢，難做淡。

幾大科技股被減持消息陰影籠罩，影響係有嘅，程度有幾多，軟銀用遠期合約沽售巴巴（9988）ADR股份，對市場壓力未算大，而南非大股東放咗騰訊（700）、美團（3690）現貨入中央結算，前者話明係市場有序沽出，後者現貨入了中央結算都未有動作，係咪已喺場外做咗合約等交收則屬未知數，所以估計相比下騰訊可能會慢少少。

恒指噚日單日轉向，低位開咗嘅大陽燭上，收市倒升34點，又上番20300上面，今個星期開喺20566，如果今日指數收高於20566，成個周線就扭轉向上，下星期就有力再上試208同21000阻力，噚日有喺低位買到現貨嘅就可以慢慢坐實。

融創（1918）復牌後跌55％，算係追回其他內房跌幅，復賽未等於公司安全，至去年年底融創股東資金只為總資產值8％，距安全線仍有一段距離。

美匯去到100.6，創近一年新低，歐元1.105，英鎊1.25，人民幣6.8725。繼CPI後，美國最新生產物價指數都放緩，並較市場預期低，美股平開後逐步向上，收市升383點，納指升2％，現貨金2050美元。