原以為噚日個市都會相對靜靜地等美國嘅CPI數據，結果就殺出個南非股東，騰訊（700）嘅南非大股東喺其自家公佈中，表示為繼續回購自家股份，會將約9600萬股騰訊存入香港中央結算，有序沽出，同早前佢將美團（3690）股份放入CCASS一樣，市場驚一驚下又引發起沽盤，企鵝股價低開6蚊後連跌破20和50天線，喺彈力欠奉下低收357元，跌19蚊。其他科網股都被拖低，AMJ全跌3％以上。

噚日另一個焦點就落喺瑞聲（2018）身上，股價上月炒起時就係市場預期因蘋果改變iPhone側鍵設計規格，瑞聲會有更多新訂單，點知噚日中信里昂、摩通同天風證券分析師郭明錤（一向有公信力的蘋果分析師）不約而同表示蘋果今年嘅iPhone 15因技術性問題唔會由預期嘅實體側鍵改為觸控式側鍵，瑞聲預期今年收入減少，並延後至2024，而呢啲唔確定性或會因新競爭者加入而令市場份額下降，致股價噚日急跌15％至15.88。

上證A股噚日反覆向上，升13點，仍能逐步咬住上。港股就因個別股份問題下跌175點，成交千億元，算係少。其實睇顧港股呢一個星期都有唔少不利消息，騰訊同美團被南非股東準備沽貨，股神繼續減持比亞廸（1211），軟銀要減巴巴（9988）同埋商湯（020），依家仍企到20300水平，其實已經算幾強，若喺弱勢時，可能20000點已不保。恒指上面兩個小頂（20751和20750）壓住，但下面暫時守得幾穩，多一次機會都會選擇候低買，穿19800就止蝕。睇吓噚晚CPI數據公佈後會否行出個方向。

消息算準，融創（1918）果然可以於今日復賽，難怪噚日內房物管板塊都企得硬。

美國3月CPI按年升5％，較市場進取預期5.2％仲低，核心按年升5.6％，付預期，下月加息機率由83％減至7成。美股先升後回，通脹回落，息囗見頂已是事實，或已大部份反映在指數中，依家又要驚衰退，驚係最麻煩，道指倒跌38點，納指跌逾百點，英國金融時報指軟銀已在今年透過軟遠期合約出售72億美元巴巴股份，並計劃今年內減持餘下3.8％，中概股指數跌近4％，拖累恒指夜期跌近300點，黑期更失守20000點。

美匯回落到101.2，歐元1.10，英鎊升近1.25，人民幣6.885。紐約期油83.1美元，現貨金2031美元，比特幣30000美元水平反覆。