假期回來後港股承夜期同黑期做好下裂囗高開230點，抽穿50天線20487，最高去到20750，高位又見回吐，一眾科技股領跌，噚日先講叫大家思考阿爺會否出囗壓一壓AI個炒風，網信辦即刻做野，就生成式人工智能技術健康發展同規範向社會公開徵求意見，其實已下達指引，當然力度肯定冇兩年前開始嘅反壟斷咁大，意見稿指生成式人工智能產品投入市場前，需按照規定向網信辦申報安全評估，並要按照互聯網信息服務算法規定，不得利用算法，平台等優勢實施不公平競爭，確保知識產權同商業道德，並要按國家網絡安全法執行。其實阿爺立場都好明確，科技創新嘅路必然要行，但國家利益同數據安全同樣重要，希望企業在發展人工智能要作出多方面考量。

上證股市一度失守3000點，收市重上3013，只跌2點，暫時當調整市。恒指收回20485，升154點，成交1200億元，若大市再上，成交要增。恒指裂囗高開，政策消息令指數日內補回上升裂囗下再上，技術上係好，上面要一步步看，企穩50天線後下一阻力是21000點。

騰訊（700）拖住個市，單日跌近9元，百度（9888）上周美股ADR時段已弱，噚日跌逾5％，商湯（020）高開一成後倒3仙收場，消息出咗，又有政策嚇一嚇，有獲利盤好正常。

醫藥醫療和內房板塊都升，前者因上周港股假期中，國內醫藥股炒上，昨日追回升幅，高開已冇得追，唯有等回調，醫療繫乎民生，一定有國家扶持。內房股大升，最勁嘅龍光（3380）升26％，板塊炒上因三月售樓數據轉好，但亦因一、二月基數較低，而內房最驚就是升一棍就完，所以寧願睇多幾日。另外有消息指停賽已久的融創（1918）有機會今個月內復牌，如屬實對板塊會有支持。

巴菲特再減持比亞廸（1211） 248萬股，套現5.4億元，持股比率降至11％樓下。

美國今晚會有最新嘅CPI通脹數字，預期係5.2％，都估得幾進取，而核心CPI仍為5.6％，外媒指因實則租金下跌仍未反映在內，第二季開始會跌得較快。