美國上周五公佈嘅大非農新增職位23.6萬個，同預期期只多少少，失業率3.5％。IMF預期今年環球經濟增長會少於3％，好快美國就會進入今年首季業績期，高盛預期應該係疫情後最差嘅一次，標普500企業季度業績會按年跌7％左右，能源、工業同必需品板塊或仍企得住。

早前美股炒息囗見頂，依家睇已差不多見頂，市場都睇最多可多加25點子，通常憧憬變現實就冇得再炒，除非市場隨之炒減息。所以近日外圍都轉換話題至經濟衰退，無疑職位數字增長已大幅放緩，製造、非製造業同消費者指數都下跌，依家就要睇下降速度同深度，配合業績期，預期道指暫時都衝唔破34000點阻力，呢個位置乃去年初高位拉下來嘅下降阻力。通常美股業績打頭陣都係金融類股份，銀行股經歷咗最近嘅一次大衝擊，打破咗市場對銀行股一向風險較低嘅觀念，反之原來行業可能係透明度低，監管不足，風險管理不善，銀行係會在喺加息環境下出現問題，多種因素下二線銀行股或以下有機會被重新估值。

巴巴（9988）上周公佈今日會有大型AI項目發布會，而周末旗下阿里雲亦宣布，大模型「通義千問」開始邀請測試，照睇個名相信都係同CHATGPT有關。另外商湯（20）亦有業務Update，推出AI大模型體系「日日新」同CHATGPT「商量」。不過上周AI相關股份喺外圍就做得麻麻，皆因義大利、德國等歐洲國家開始因數據安全問題而停用或研究停用CHATGPT，拜登亦話有需要加強監管，咁中國呢？以往有用數據安全問題去監管幾大科網平台，今次對CHATGPT係咪會鬆手就值得大家思考一下。

港股喺假期前企得穩，幾個支持位都未有失守，上周四低位20099，已乎合接近21000邊的前設，只因長假前只有小量買入，恒指收回上20300，而夜期同外圍恒指上周五最後都搶到上20500水平，主要因巴巴嘅大型發佈會令ADR股價搶到上約100港元。

美十年債息3.36厘，美匯反彈上102.23，日本新行長表示維持負利率是適當，日圓回軟，美元兌日圓升上133.5，英鎊1.235，而人民幣則為6.8925。美股反覆靠穩，聽日同後天就有CPI同PPI通脹數字，納指、中概股指數微跌。