清明假期前港股都係行先跌後反彈，1,200億成交唔多唔少，科技股跌，錢又流去中字派股份，金管局又再接港元沽盤，未有新資金入市，金融股企穩，中資電訊股同基建股向上。恒指最低20126，算係接近20000邊，指數在上月低位18829拉上嚟嘅上升支持差不多喺20100水平，假前叫做守到，10天線20049同250天線19800都係再落去嘅重要支持，個市要升，理論上19800係唔應該跌穿嘅。圖表看依家應該係逢低買較逢高做淡較為合理。

科技股股受壓，美團（3690）尤其弱，皆因3月24日騰訊（700）盡派美團股份後，高盛持倉多咗2.5億股，市場估計應該係南非股東放入高盛，暫未有公佈任何動作，究竟係為交收用抑或市場放售就未知，但市場驚一驚下就跌咗4.5％。騰訊仍硬淨，京東（9618）守得住161元嘅10天線，接近161元有值搏率。巴巴（9988）可以喺92元水平留意。生物醫藥同醫療器材股積弱多時，前日見最好嘅兩隻信達（1801）同康方（9926）開始喺低位出大陽燭，板塊係咪轉勢暫未能確認，不過今個月外圍會有癌症嘅藥物研討會，或者會有啲刺激。

外圍市況中，日本服務業採購經理指數好過預期，反映日本經濟喺疫情後慢慢回復中，開關恢復旅遊下香港人都幫了唔少，但日股噚日就回落逾400點，終止3連升。內地清明休市一天。紐西蘭加息半厘，而澳洲就維持息率不變。

美國股市連續兩日相對偏淡，摩通出來唱淡，指危機未除，美國職位空缺相對失業人數比例跌至16個月新低，新公佈嘅小非農數字都遜預期。道指兩日累跌150點，納指跌210點，重磅科技股領跌，中概股指數都下跌2.7％，而外圍恒指亦由升140點轉炒平水。

美10年息進一步回落到3.3厘，兩年息3.78厘，暗示市場預期聯儲局再加息機率下跌，美匯失守102，最新為101.5，日圓升上130.8，英鎊1.24，歐元1.09，人民幣6.8847。