周末沙地為首嘅油組宣佈減產，俄羅斯跟住減，結果由5月起至年底一共每月減產160萬桶，理由就係要穩定油價。美國上年一直喺市場沽出戰略性石油去壓住油價，幫助壓通脹，依家油組同俄羅斯突然減產托油價，美國一定唔好受，如果因為咁美國通脹下降速度放緩下，唔通5月又要加多一次息。除此外，時間上又係敏感，記得早前中國高調和解沙地同伊朗關係，恢復外交，美國喺中東地位動搖，美國內媒已經冇大事報導，今次習主席訪問沙地同俄羅斯後，兩國突然有呢個決定，係衝着美國來，未來究竟中美關係會因中國國際地位提升，互相忌諱下而緩和，就算囗和心不和都好，抑或美國會加大其保護主義力度就要時間去證實啦！

噚日內地公佈3月份財新製造業PMI數據，只得50，險守盛衰分界線上，預期51.4，上月為51.6，顯示國內疫情後積壓嘅需求喺今年一月已大部份爆發出來，反彈勢頭減弱咗，睇來新一屆政府又有工作要做，要加大力度再扶持經濟。內地股市就未有受影響，上證A股升24點，收3296，又再挑戰上面3308阻力。

港股未有跟國內股市上，全日先回後反彈，收市倒升9點，下面19800至20000點間，10天、20天、100天同250天線幾近重疊，估計會係重要支持所在。恒指噚日低位20226，未到預期20000點水平，未有加倉，只做其他個別短炒動作，唯有等下有冇機會喺外圍一跌下有機會入市。嗶哩（9626）有博主發起停更潮，跌4.5％，科技股有壓力，只得騰訊（700）頂得住。資金又流回去電訊、保險同銀行股，未見有全面向上動力。

減產令油價上升，紐約期油升穿80美元，油股大幅反彈，帶動道指升愈300點，10年債息 3.4厘，納指則下跌48點，Tesla 3月出貨未如理想，大摩分析員表示美股仲有下跌空間，建議買入防守性較強嘅股份。承噚日港股科技股下跌，中資股金龍指數下跌1％。

現貨金終升破2000美元，美匯進一步跌至101.74，英鎊升上1.24，歐元1.09，人民幣6.875。