美國2月個人消費支出（PCE）物價指數按年上升5%，預期為漲5.1%。核心PCE物價指數按年上升4.6%，預期為漲4.7%，全部低於預期，市場憧憬通脹繼續緩和下，美國息囗有機會已見頂或接近見頂，下一次聯儲局會議喺5月，會唔會再加多最後一次25點子仲係未知數。美股上星期五繼續造好，道指升愈400點，納指升愈200點，繼Michael Burry對早前睇淡美股認錯後，花旗都加入睇好行列，道指第一季只升0.38％，反觀納指就升4.56％，息囗敏感度高板塊開始追回失地。根據以往數據，美國總統第三年任期股市上升機率較高，但減息期開始前至減息初期，下跌機會就較大，皆因減息多源自經濟出現問題，所以市場一定會作出反應，故市場亦不乏人看淡美股前景。

美10年債息落到3.47厘，美匯102.85，日圓避險作用暫失去，自行回到132.76，英鎊1.235，人民幣6.8703。紐約期油升近75美元，現貨金繼續受制2000美元大位，最新1986美元。

港股上周先低後高，原先估計大市升三個月，回兩個月，調整目標黃金比率 0.5嘅18600差少少就到，結果最後一星期就突然出現馬雲回國、巴巴（9988）重整架構、京東（9618）分拆幾大事件，恒指提早衝穿20000點樓上，但50天線20618又得而復失，恒指上得番20天線上，基本上中短線係可以逢低買，既然20600上面頂住，就等有冇機會喺20000邊再買過。今個星期得三個交易日，下星期四個，所以資金都未敢大舉入市，日日成交都是最多千三、四億，股份日日輪流炒，雖話板塊輪動，但冇貫注力，除幾隻大股外，其他股份有波幅，冇升幅，市況係好轉，但未見有全面向上訊號。

早前提過3月底前不適宜買中小型內房股，就係驚未能公佈業績，但估唔到係旭輝系出事，已派到成績表嘅就脫離了危險期。國內二月樓市雖然價微跌，但成交已回升上去，板塊最安全都係中海外、華潤同越秀幾大派系。