美國正研究為銀行存款全面擔保方案，目的就志在安撫人心，多為意識形態，為免令本來冇事嘅中小型銀行，因信心問題存戶擠提而令銀行出現問題。至於仲有冇銀行會出問題，真係要等時間去證實。而美國今晚就會有議息結果，大家都觀望聯儲局嘅息囗決定和會後言論。

中港股市就唔等佢講話，自己炒咗上去先，上證指數都喺區間上落，噚日升20點，守到由舊年11月拉上嚟嘅上升支持上面。港股由上星期一開始行單跳，依家仲未斷纜，噚日成交縮到千億元下升 258點，又重上19100。噚日見資金由早前熱炒嘅中字系股份轉入跌咗好耐嘅科技股，騰訊（700）今日公佈業績，昨日先炒高2.6%。

恒指上月28日，今個月10日、14日同20日，指數一浪低於一浪，相反9RSI就一浪高於一浪，似做咗個多底背馳，另外多隻科技股都出現唔同程度嘅背馳，有機會顯示指數甚至重磅股份都接近調整完成。噚日都見以科技股為主嘅深成指數都升咗1.6%。港股中，生、醫療，健康類股份回一日又起動，板塊有機會又再早過大市見底。

吉利汽車（175）公布至去年底止年度業績，股東應佔溢利52.6億元人民幣，按年增長8.52%，每股盈利51.06分，末期息維持0.21港元。公司表示新能源汽車毛利率表現仍然大幅弱於燃油車，加之其佔比快速提升，毛利率按年下滑3個百分點，至14.1%。

美息加25點子暫時是大多數人嘅預期，美國債息都回穩，預期新嘅點陣圖都會較中性，美國銀行股反彈，道指上升316點。Meta同Tesla獲調高投資評級，納指升180點。紐約期油回升2%，美匯企103，人民幣6.8772。

外圍恒指報19420，預示今早高開180點。