結果經過討價還價下，瑞銀以換股方式收價瑞信（CS），作價30億瑞郎，較去年瑞信配股集資40億還少，睇嚟瑞信裏面條數可能真係幾嚇人，瑞士央行借出500億瑞郎，都阻止唔到資金轉走，存戶對瑞信信心崩潰，否則瑞士政府唔會咁緊張盡快要完成單Deal，希望資金流喺瑞士銀行體系，仲要包起瑞信90億瑞郎潛在損失擔保，又要向瑞銀提供1,000億瑞郎流動性援助，表面上事件好似告一段落，其實又係一次保存戶，穩金融體系嘅措施，而股東、債劵持有人就自己顧自己，有成160億美元低級債劵近一文不值，買呢啲債劵都一定係大機構專業投資者，一般都係保險公司、Mutual Fund，或者係金融機構，加上瑞信今次算賤賣，對環球金融股份估值都有影響，港股中見滙控（005）跌近6%、渣打（2888）跌7%，友邦（1299）跌4%。通常債權持有人獲賠級別應較股東為高，今次做法可謂史無前例，股東可以換成瑞銀股份，反而呢批債主就血本無歸，成個規則被扭轉，除咗有機構要做撥備外，債權人基本權利都失去，未來公司發債成本一定上升。

美國星期日晚又有報導指全國有200間地區銀行可能會出問題，情況可能同SVB一樣，冇人提款走，銀行唔需要賤賣資產，可能捱得過，最驚報導一出，又引發各式各樣嘅擠提，結果又是一樣，冇事都變有事。噚日亞洲時段美債息期貨都跌，兩年債息3.7厘，兩星期前講緊5.1厘，十年債息3.33厘，Fed Watch 利率期貨顯示資金正落注年底前要減息50至75點子，今晚聯儲局就開始議息，就睇下鮑Sir有咩講，資金估佢唔敢做世紀罪人，起碼冇得再囗頭鷹，明晚會有結果。

港股低開19352後，反覆向下，說好的19100話穿就穿，低見18829，成交1,300億元，中字系股份最終都頂唔住，電訊股回落，基建股大多喺上面開了支長針。恒指再創近期低位，科指則仍未，係未肯跟跌抑或已過早跌咗，要睇，不過可以存記，已見騰訊、快手同美團已跌唔穿今個月10號低位。醫藥、康健板塊上周開始上升，噚日回吐，先當後抽。

另一隻有故事而跌得較多嘅就係金蝶（268），公司主要做商業軟件解決方案，但底層技術是由外國引入。話說上周華為任先生喺一個訪問中提及華為已經成功開發咗一套中國自主研發嘅SAAS軟件，即將投入市場，對金蝶係一個衝擊，而且喺依家保護主義籠罩下金蝶產品會存在有數據外洩機會，所以金蝶同國內另一隻同類公司用友股價都受壓。

美股反彈382點，大型銀行股回升，美股時段10年債息回升到3.5厘，而市場亦預期明晚加25點子嘅機會較高。紐約期油反彈上67美元，現貨金一度升穿2,000美元，最新為1,981美元，而美匯進一步回落到102.95，英鎊1.225，人民幣6.8748。

外圍恒指重上19200水平，預示今日港股高開約150點。