美股四期結算日喺金融股動盪下再度下跌，早前出事嘅銀行消息不斷，聯儲局救存戶棄銀行，SVB母公司SVB金融已申請破產保護，FRB雖然有華爾街幾大行打救，上星期五都要跌33%，銀行有打算配股集資，甚至賣盤，銀行股指數跌逾5%，道指跌384點，完全蒸發上星期四升幅，S&P就繼續3900點攻防戰，納指跌86點，跌幅不足1%，繼續跑贏大市，微軟同Google母公司Alphabet 逆市上升，兩隻都同近期人工智能概念有關，微軟更會將功能加到佢嘅office軟件中。噚晚亦有兩宗關於美銀行業的消息，一係拜登政府已向股神巴菲特請教點樣處理今次銀行業危機，二係瑞士銀行或以10億美元全購瑞信，唯後者傳以價錢太低唔願意接納。

今個星期聯儲局會議息，今次加25點子，或者今次唔加，5月先加25點子，利率都有機會封頂。美國生產物價指教PPI已連跌7個月，通常PPI行先CPI三個月，加上油價跌，最難估嘅服務業通脹上月都開始回落，租金通常滯後樓價4至6個月，相信第二季經濟數據有利聯儲局停止加息。

港股上周玩單跳，日升日跌，下面頂住講個條前勁線阻力變支持嘅19100，上面受制250天線19856，呢個跌浪指數未試過連升兩日，上日收19518，夜期就跟外圍回到19250水平，若果喺呢個區間能行多幾日，係築短底抑或完成調整就未知，但有開始搏得嘅條件，升三個月，調整兩個月，合理。

上周五收市後人行宣佈下調金融機構存款準備金率25點子，估計係因為外圍銀行業問題，主要係預防並為市場提供長期流動性，或有助減低銀行資金成本。今次降準預期釋放流動性或略多於5000億元人民幣，但中金則估計要再減息機會就較少。上證指數上星期五一度升到上20天線3279就回落，雖然未話倒跌收場，唯留低一條長上影線，可能有人早知炒一炒，但貫注力就不夠。降準消息公佈後，恒指夜期都冇反應。

公司業績：

洛鉬（3993）去年盈利60.67億元人民幣，升18.8%，每股盈利0.28元。

小鵬（9868）2022年虧損91.39億元人民幣，較2021年差不多多一倍，每股蝕5.34元。並預計今年首季汽車交付同收入都較去年同期少四成以上。公司管理層表示新一輪嘅技術同控制成本會喺今年第三季後才可反映出來。

美10年債息進一步下跌至3.43厘，現貨金升近2000美元，紐約期油跌2.36%至66.74美元。美匯回到103.86，避險下日圓續強，美元兌日圓跌至131.85，歐元升近1.08。