連環金融機構爆雷事件，環球股市大幅波動，不過今次相關政府都出手好快，盡量唔容許事件發酵，SVB係資產錯配同存款急跌拖累，瑞信情況就相對麻煩，因規模較大，瑞信2021年喺Archeges Capital 已虧蝕咗60億美元，去年底有形資產約400億美元，總資產5,300億美元，用400億美元去承擔5,300億美元的資產波動性，危險度都幾高。2022年下半年又蝕約60億美元，年化計120億美元，若三年幾都係咁，公司就差唔多資不抵債，喺各項收入不斷萎縮同股價以星期三收市計PB只得0.17倍計，基本上已好難在市場上集資，好彩瑞士政府肯出手，否則環球牽連性都幾大。不過今次事件timing又幾準，瑞信傳出有問題，已經唔係今天嘅事，剛好又喺歐美議息前，順勢畀歐央行、聯儲局多啲壓力，結果Fed Watch 顯示美國下星期有5成機會維持息率不變。

港股今個星期日升日跌，噚日跌336點。成交就好少，指數失守100天線，但仍企得在19100前頸線位上面，指數就lock住喺區間中。科技股個別發展，快手（1024）、美團（3690）都跌唔落，企鵝跌得最多，金融股被拖累，中移動（941）企得住，聯通（762）就跌4%。

百度（9888）準時兩點開「文心一言」發佈會，並開啟邀請測試，會上指其有市場需求，但仍有很大進步空間，股價則未如理想，兩點時股價仲喺130元水平，20分鐘後已跌到120元，收125元，都仲跌6.5%。

長實（1113）去年盈利217億元，升2.08%，收入按年減少9.26%，每股盈利5.98元，末期息1.85元。長和（001）則多賺9.54%至367億元，末期息2.086元，當中非經常性收益97億元。

歐美股市回穩，歐央行加息50點子至3.5厘，歐洲加息遲起步，正常。美國幾大銀行聯手救FRB，帶動股市回升，道指升1.1%，納指最勁，升280點，大型科技股全做好。美債息從波動中回穩，美匯104.25，人民幣6.8966。