美國新公佈的CPI都合符預期，起碼冇驚嚇，而住房租金部份都開始見回落，暫時可能唔需要擔心通脹會反手上升，大企業繼續cut人，期望第二季通脹回至到按年升5%樓下，聯儲局就冇得再囗頭鷹。

噚日歐洲開市初段，瑞信大股東Saudi National  Bank表示因監管問題，唔會對瑞信提供財務援助，瑞信股價歐洲時段一度急跌30%，信用違約調期（CDS）亦急升，儘管主席點解畫，市場都投沽貨一票，加上美國因今次事件正研究加強金融機構監管，消息影響市場情緒，歐洲股市全面下挫，美期盤前跌逾600點。

撇開瑞信，美國暫時地區性銀行危機未見有無限蔓延出去，未必大多銀行做duration management 都咁差，但依家訂下嘅250億美元只夠現有三間出事銀行包底，再有嘅話聯儲局係咪可以再提高金額都屬未知數。依家多咗瑞信事件，且看儲局點樣力挽狂瀾。

港股跟外圍同上證彈，一度升穿19600，當然最後都收唔到喺上面，皆因幾大科技股縮得較快，只係靠中字系股份頂住個市，上極有限，個市要升，幾大科技股一定要行。恒指就夾住係100天線（19311）同250天線（19867）間上落。夜期開市後受外圍拖累下400點。個別板塊股份中，百度（9888）今日下午會有其「文心一言」發佈會，剌激唔大，返而見生科股連續兩日都錢流入，上次港股大升浪開始前，生科股已率先起動，希望今次都一樣，港股有機會進入調整嘅後期。

美國上月嘅生產物價指數（PPI）按月跌0.1%，按年升4.6%，全較預期為低，如果冇銀行業嘅問題，呢個數據對息囗去向是有正面幫助。

美股最多跌700點，最後迫到瑞士央行出聲，必要時會提供流動性支持，美股跌幅先至收窄到280點，納指冇起跌，息囗隨時多25點子後就見頂，隨咗業績外，科技股少一種擔憂。10年息跌穿3.5厘，2年債息4厘都失守。避險下現貨金升上1926美元，紐約期油就相反怕經濟衰退，跌至68美元。美匯彈番上104.3，日圓都升，最新做133.05，避險也，人民幣6.8952。