美國今次銀行嘅小型風暴，表面上好似暫時解決咗，政府包起客戶存款，之後銀行就要自己諗辦法。今次事件亦可反映出美國有部份銀行原來喺聯儲局急速加息後係會出現問題，而政府亦只救存戶，銀行就自生自滅，難怪上市嘅其他地區銀行股份都遭拋售，銀行收存款作投資係業界正常運作，出事銀行多集中於科技初創同虛擬貨幣客戶，再加上「借短買長」同埋瘋狂加息先出問題，其買入嘅金融資產暫時仍算安全，只係等唔到到期就要沽售，仲有幾多間銀行會出事。事件令環球金融股都受壓，歐洲股市、日本股市嘅金融分類指數跌超過5%，港股中，滙控（005）跌5%。

市場等緊噚晚美國公佈嘅最新CPI數據，噚日亞洲區時段利率期貨顯示今個月加25點子機率只一半多少少，剩餘係維持不變，相比上星期有七成半預期係加50點子已經天淵之別，高盛、野村等大行已講應停止加息，更有話要重啟量寛。依家問題係若CPI數據好過預期，聯儲局有唞下氣空間，但萬一通脹落唔到，或甚至差過預期，聯儲局就會係兩難，正常嘅就會先救經濟，因經濟衰退加高通脹好大機會變滯脹，到時救都冇用。如果今次通脹數字頂得順，聯儲局有機會buy time，盡快喺下次會議前收集所有銀行  mark to market 下嘅財政數據，去衡量如需再加息下金融體系要承受嘅風險。

中港股市噚日都向下走，上證一度跌逾50點，收市跌23點，暫時都守得住去年10月底拉上嚟嘅上升支持（現接近3230）。恒指低開後繼續跌落去，100天線都失守，現正考驗第一個支持位19100，再落就18600，噚日已講過，要扭轉頹勢就要守得住19600並盡快收復250天線，結果噚日即掉頭向下，所以話只係當反彈睇最安全。

結果2月CPI按年升6%，符預期，而核心則按月升0.5%，較預期0.4%高少少，整體數據可以接受，市場憧憬今個月或可停一停，有需要5月先加，道指近500點升幅一度蒸發，尾市再拉一下，最後升370點，納指升240點。地區性銀行股反彈，META繼續裁，升7.3%。紐約期油進一步下跌至71.8美元，美匯103.35，人民幣6.8825。