噚日開市前美國嗰邊傳出美國政府會為SVB同Signature  Bank所有存款包底，救存款，唔救銀行，美期彈，美金回落，港股亦都借勢反彈，最多升到上19800水平，未到250天線（19878）就要掉頭回落，叫做回補少少上星期五嘅下跌裂囗，恒指收19700，升385點。噚日恒指算係反彈，陰非可以幾日內先企穩19600，再收復250天線，嗰還可以相信上星期五嘅一跌是因個別市場突發事件嘅因素而導致，否則都係當反彈處理，先等一下，睇番噚日講嘅19100同18600兩個位。

今次美國銀行嘅小風暴，除咗令股市動盪外，亦令到市場對加50點子嘅預期差唔多減到零，高盛更大膽表示今個月更唔應該加息，美匯回，人民幣噚日亞洲區時段更一度彈上6.866，中港股市做好，而美國今晚就會公佈最新嘅消費物價指數（CPI），預期核心通脹上升0.4%。

講番港股，依家重回舊年12月大戶積極入貨區域，成個月都喺19000至20000點上落，到今年初先衝上去，依家重回起步點，究竟佢頂唔頂，或者有冇新錢入市，都係關鍵。噚日升市中，科技股到最後都腳軟，都係靠「中」字派股份支撐大市。

消息指美國電動車生產商（Tesla）嘅低價車因質量問題將唔再使用比亞迪（1211）電池，而轉向要求LG Energy Solution研發磷酸鐵鋰電池。

滙控（005）以一英鎊收購SVB UK後，計劃注入20億英鎊流動資金，滙控股價ADR較香港噚日收市低3%。

儘管拜登都出嚟派定心丸，指美國銀行體系健全，但地區性銀行股繼續被洗倉，噚日提及嘅First Republic 、Pac West 再跌60同20%，大型銀行如花旗、美銀都跌逾5%，最直接都係信心問題。

美股非常反覆，先跌300點後倒升300點，收市所有升幅又歸零，道指跌90點，金融主導道指走向，納指可能因預期聯儲局可能會鬆手，都仲有50點進帳。美國兩年債跌至4厘，十年債跌至3.58厘，美匯103.22，日圓升上133，人民幣6.8532。