上周五美股承接跌勢再下跌，道指跌1%（345點），、納指跌1.76%（200點），最新公佈嘅非農業職位增加31萬個，預期為20萬個，失業率3.6%，預期為3.4%，數據有好有壞，反映美國就業市場氣氛或緩和，而今個月加50點子機會亦減少，美國十年債息回落到3.7厘，美股早段曾一度上升，其後因為近期有兩間銀行出現問題，包括做虛擬貨幣嘅Silvergate同埋喺矽谷客戶集中喺初創企業嘅SVB，後者亦於上星期五晚被政府接管咗，市場信心下跌，沽售風險資產，而VIX恐慌指數亦曾升上28的四個月新高，所以美股都係要跌市收場。

今次SVB出事有一定程度上同美國息囗上升有關，SVB客戶大多數都是初創企業，客戶收到投資者資金後就放喺銀行，高峯期逾2,000億美元，而銀行收到客戶存款就外借或者喺融資市場買入資產，以賺取息差，而SVB就逾一半資金都買入按揭債劵，樓市冇大跌時持有債劵到到期日都會拎返本金加利息，低息囗時大家運作一切正常。但美國21年開始加息到現時已去到4.5至4.75厘，利率升，債價自然跌，如果揸到尾都冇問題。問題就在於SBV客戶集中喺科技初創企業，低息時搵到人或創投基金投資，舊年開始好多創投基金都因息囗上升而減少科技行業投資，嗰啲初創企業大多都係燒錢多，不斷使錢而又冇辦法籌新資金，結果就係銀行存款減少，銀行又要維持一個最低嘅資本要求比率，當存款跌，銀行就要賣走一部份資產變現，SBV就係要低價被迫沽出210億美元債劵，錄得18億美元虧損，結果公司想批股集資，股價再跌，令批股方法失效，存款客戶失信心，會紛紛提款走，銀行被迫又要再賣資產，造成一個惡性循環，結果就淪為被政府接管咗。

依家問題係美國中小型銀行中會有幾多間開始出現問題，存款減少加上被迫減持手上投資，上星期四、五，已見再有兩間地區性銀行First Republic  Bank同Pac West Bank 股價都跌咗五成，大型銀行暫時都安全，起碼存款客戶分散喺唔同行業。不過今次事件或會令美國銀行業落雨收遮，減少借貸，加上科技、金融業裁員影響會慢慢浮現，或可令聯儲局在加息過程中多啲顧慮。

港股上星期五一開就裂囗跌穿19600，下一個最低位就係調整0.5嘅18600，成個市場圖表派都知，但中間都有一個參考位，就係恒指舊年喺10至11月做咗一個頭肩底，條頸線伸延過嚟由阻力變支持下，依家就喺19100水平。講開頭肩底，恒指周線圖者做咗一個疑似大型頭肩底嘅形態，左肩19178，底部14597，如形態成功依家就做右肩，19100，甚至低少少嘅18600就有機會係底。

美匯都跟債息落，最新跌至104.64，日圓反彈至135，英鎊重上1.2樓上，而升期積弱嘅人民幣都回升上6.94。美匯軟，現貨金升上1867美元，紐約期油76.8美元。Silvergate出事，連同市場較 risk off，比特幣曾一度失守20000美元，現報20500美元。