前晚美國小非農數字又係好過預期，勞工市場依然強勁，回想起前晚鮑Sir講話，應該對即將公佈數字都有掌握到，所以先放鷹，而今晚就會輪到公佈大非農，估計數字都係強，問題係星期二晚大跌後入咪已反映咗強經濟，通脹難壓同埋有機會加50點子。不過有一點值得留意嘅係就業市場顯示高薪職位正流失，低薪職位就唔夠人手，平均工資有下降可能性，希望可以喺未來幾個月反映出嚟。

上證指數兩日都跌到約3260就反彈，出咗兩支腳仔，但係失守咗3300點個勢頭就唔好，依家只可以話唔跌住，最少重上10天線先可以暫時唞下氣。國內開緊兩會，大家都等緊佢會後言論，未來發展方向，同有咩新措施扶持經濟，亦都會留意有冇共享經濟同房住不炒等字眼。

港股股一樣，都係一個等字，噚日彈一彈都冇力再上，只有「中」字派股份股價頂住，中移動（941）、中電信（728）分別上升3同4％，基建股上唔到，市場信國家搞數字經濟多過再搞基建。恒指倒跌125點收市，仍處250天線（19893）上，但連開三枝陰燭，20000點邊再磨落去唔係好事。估計一穿落去就唔只19600，而指數就會喺較低嘅一個區域橫行（186至19600）。

京東集團（9618）公布去年底止年度業績扭虧為盈，股東應佔溢利103.8億元人民幣，前年同期虧損35.6億元，每股盈利3.32元，派發股息0.31美元。市場好似唔收貨，股價噚晚ADR時段下跌12％，折合約港元164 元。

美國上周新早申領失業人數為21萬人，意外地較預期為多，而數據亦顯示美國企業1月同2月裁員人數為2009年來新高，或者顯示就業市場有機放緩，但美股彈一下又再跌過，道指跌540點，終於跌穿32600支持，而納指亦下跌237點，銀行、科技股領跌。京都帶頭下中資股指數跌5%，亦帶住外圍恒指跌450點，去到19450。