港股上證噚日行同一條套路，睇時間判斷國內股市似主導，上證早段先升20點後，午後倒跌36點收市，掉轉頭跌穿3010後抽支持同3000點心理關囗，上證指數升穿3010阻力後幾日就已冇貨賣，3080係第一個支持，下一個位已經係3027。

恒指仲戲劇性，好淡都殺，朝早十點零五分突然升穿20天線，分鐘圖現五支陽燭，五分鐘內夾到上21000點水平，市場上冇任何消息，睇圖嘅都睇到恒指10天同20天線間等開邊，向上一穿就會觸發淡倉平倉，但速度就太快。之後跟國內股市愈回愈急，竟跌近升10天線20325水平先反彈，高低波幅650點，收20534，跌68點。恒指經過一日大上落後，又係重回10天同20天線間位置嘅起步位置，既然佢行唔出方向，倒不如唔好玩指數相關產品，等佢開邊先算。

深證指數主要成份都係科技股，近期一向都跑輸比以傳統股份為主嘅上證，所以港股入面嘅科技股仲未有運行。噚日上升時做好的嘅「中」字派股份都跟大市回落，「中」字頭股份已強了一輪，炒國進民退同股值收復，幾大電訊股高開低收帶頭回吐，中電信（728）同聯通（762）跌4至5％，其他中資基建股份都出了枝長上影線，石油化工股遲起步，仲維持到有升幅。

公司業績中，呷哺呷哺（520）料去年虧損3.2億元人民幣，明源雲（909）預虧11.4億元。

鮑威爾喺聽證會上又放隻鷹出嚟，今個月加50點子嘅機會上升，而預期利率峯值或高於5.65厘。美股應聲下挫，道指跌575點，納指跌145點，市場等緊今個星期五嘅非農數據。鮑sir言論下，美10年息又重上4厘，美匯急升上105.65，其他非美貨幣全跌，日圓137，英鎊跌至1.18，人民幣插至6.99。美元升，其他資產差不多全跌，紐油跌至77.8美元，比特幣跌至22000美元水平。

港股黑期跌至20250水平，預期今日低開約250點。