港股低開後上番去，全日就係鎖死喺10同20天線間上落，高低波幅300點，好窄，收喺20603點，微升，成交1,090億元。日中人民幣輕微跌到6.926，上證股市走軟，微跌6點，仍算企得住。

噚日恒指低開，主要係科技股帶跌，周末兩會中新聞或傳聞多多，有說未成年玩網游規範會較嚴格，騰訊（700）受影響，巴巴（9988）有啲直播帶貨被點名，另外內地有傳百度（9888）嘅CHATGPT 係試玩中錯答了一些敏感性題目，新聞面上搵唔到，但百度股價就最多跌逾2％。恒指仲有得升就全靠幾隻電訊股，港交所（388）、滙豐（005）同銀娛（027）頂住。既然恒指喺10天同20天線已經行咗3日，指數倉位就應該用這兩條線做相應部署。穿10天線好倉走，而上穿20天線淡倉就離場。

噚日另外一個焦點就係碧服（6098）發盈警，當中亦包括有商譽減值，碧服股價一度跌近一成，埋單跌2.7％，成個板塊受壓，踏入3月，內房物管板塊係有啲隱憂，因為係業績期，擔心唔係業績倒退，過往一年國內樓市信心低迷，銷量下跌，業績當然差，最驚係過唔到核數嗰part ，出唔到業績要停賽就最麻煩，大隻嘅照道理冇呢個風險，中小型嘅就月底前避一避較好，等佢出到業績先再決定係咪入市，好似噚日又有正榮（6158）公佈有三筆債未能償還或付息。

美國今晚又有鮑局長講話，星期五會有大非農數據，美股上周四、五連升兩日後反覆。美匯104.25，日圓136，人民幣6.95，人民幣反彈後迅速回落，可能同兩會暫未有乜嘢重要發展公佈有關。